పామూరు, సూర్య ప్రతినిధి :‌

పామూరు మండలంలోని బొట్లగూడూరు గ్రామంలోని అంగన్వాడీ కేంద్రంలో శనివారం  పోషణ మాసోత్సవం కార్యక్రమాన్ని నిర్వహించారు. ఈ కార్యక్రమంలో తెలుగుదేశం పార్టీ రాష్ట్ర కార్యదర్శి కోటపాటి జనార్దనరావు ముఖ్య అతిథిగా పాల్గొన్నారు. ఈ సందర్భంగా జనార్దనరావు మాట్లాడుతూ చిన్నారుల ఆరోగ్యకరమైన ఎదుగుదలకు పౌష్టికాహారం ఎంతో కీలకమని అన్నారు. గర్భిణులు, బాలింతలు, చిన్నారులకు పోషకాహారంపై అవగాహన కల్పించడంతో పాటు అంగన్వాడీ కేంద్రాల ద్వారా అందుతున్న సేవలను సద్వినియోగం చేసుకోవాలని సూచించారు. చిన్నారులకు పౌష్టికాహారం అందించడం ద్వారా వారి శారీరక, మానసిక ఎదుగుదలకు దోహదపడుతుందని తెలిపారు. పోషణ మాసోత్సవం ద్వారా ప్రజల్లో పోషకాహారంపై మరింత అవగాహన పెంపొందించాలని ఆకాంక్షించారు. కార్యక్రమంలో టీడీపీ గ్రామ యువ నాయకుడు కోటపాటి రాజా, గుర్రాల నాగేశ్వరరావు, బీజేపీ నాయకులు ఉమ్మడిశెట్టి శ్రీను, విజయకుమార్‌చారి, స్వయంకృషి సేవా సంస్థ అధ్యక్షులు నాయబ్ రసూల్, పామూరు క్లస్టర్ అంగన్వాడీ సూపర్వైజర్ గోళ్ల పద్మజ, అధికారులు, అంగన్వాడీ కార్యకర్తలు, ఆయాలు, ఆశా వర్కర్లు పాల్గొన్నారు.