ఎస్‌ఐఆర్‌లో ఓట్ల తొలగింపుపై కాంగ్రెస్ నిరసన జ్వాల.. నేడు మేడ్చల్ కలెక్టరేట్‌ ముట్టడి:డీసీసీ అధ్యక్షుడు తోటకూర వజ్రేష్‌ యాదవ్‌ పిలుపు
మేడ్చల్ జిల్లా ప్రతినిధి, మేజర్‌ న్యూస్‌,( అక్టోబర్ 06):ఓటర్ల జాబితా ప్రత్యేక సవరణ (ఎస్‌ఐఆర్‌) ప్రక్రియలో అర్హులైన ఓటర్ల పేర్లను అక్రమంగా తొలగిస్తున్నారని ఆరోపిస్తూ కాంగ్రెస్ పార్టీ ఆధ్వర్యంలో మంగళవారం మేడ్చల్–మల్కాజిగిరి జిల్లా కేంద్రంలో భారీ నిరసన కార్యక్రమం నిర్వహించనున్నారు. ఏఐసీసీ అధ్యక్షుడు మల్లికార్జున ఖర్గే, టీపీసీసీ అధ్యక్షుడు బొమ్మ మహేష్‌ కుమార్‌ గౌడ్‌ పిలుపు మేరకు రాష్ట్రంలోని అన్ని జిల్లా కేంద్రాల్లో ‘ఇండియా’ కూటమి భాగస్వామ్య పార్టీలతో కలిసి ర్యాలీలు, ధర్నాలు, కలెక్టరేట్‌ల ముట్టడి కార్యక్రమాలు చేపట్టనున్నట్లు నాయకులు తెలిపారు.
ఇందులో భాగంగా మేడ్చల్ జిల్లా కేంద్రంలోని కలెక్టరేట్‌ ఎదుట డీసీసీ అధ్యక్షుడు, మేడ్చల్ నియోజకవర్గ ఇన్‌చార్జి తోటకూర వజ్రేష్‌ యాదవ్‌ ఆధ్వర్యంలో భారీ మార్చ్‌, నిరసన ధర్నా నిర్వహించనున్నారు.
ఓటు హక్కు, ప్రజాస్వామ్య పరిరక్షణకే పోరాటం
ఈ సందర్భంగా వజ్రేష్‌ యాదవ్‌ మాట్లాడుతూ ఎస్‌ఐఆర్‌ ప్రక్రియ పేరుతో అర్హులైన ఓటర్ల పేర్లను తొలగిస్తున్నారనే ఆందోళన ప్రజల్లో నెలకొందన్నారు. ప్రతి అర్హుడికి ఓటు హక్కు కల్పించడం, ఓటర్ల జాబితాలో ఎలాంటి అవకతవకలకు తావులేకుండా చూడటం, ప్రజాస్వామ్యాన్ని పరిరక్షించడమే తమ పోరాటం ప్రధాన ఉద్దేశమని స్పష్టం చేశారు.అర్హులైన ప్రతి ఒక్కరి పేరు ఓటర్ల జాబితాలో ఉండేలా చర్యలు తీసుకోవాలని ఆయన డిమాండ్‌ చేశారు. ఎస్‌ఐఆర్‌ ప్రక్రియలో చోటుచేసుకున్న అవకతవకలపై కేంద్ర ప్రభుత్వం స్పందించే వరకు ప్రజాస్వామ్యబద్ధంగా ఆందోళనలు కొనసాగిస్తామని తెలిపారు.
భారీగా తరలిరావాలని పిలుపు
మేడ్చల్ జిల్లా కలెక్టరేట్‌ వద్ద నిర్వహించే నిరసన కార్యక్రమానికి మాజీ ఎమ్మెల్యేలు, నియోజకవర్గ ఇన్‌చార్జీలు, డీసీసీ సభ్యులు, డివిజన్‌ అధ్యక్షులు, యువజన కాంగ్రెస్, మహిళా కాంగ్రెస్, ఎస్సీ, బీసీ, మైనార్టీ విభాగాల నాయకులు, అనుబంధ సంఘాల ప్రతినిధులు పెద్ద సంఖ్యలో హాజరుకావాలని వజ్రేష్‌ యాదవ్‌ పిలుపునిచ్చారు.అలాగే ‘ఇండియా’ కూటమి భాగస్వామ్య పార్టీల నాయకులు, కార్యకర్తలు, ప్రజలు భారీగా తరలివచ్చి కార్యక్రమాన్ని విజయవంతం చేయాలని కోరారు.
పన్నాల బాల్ రెడ్డి, మేడ్చల్ జిల్లా ప్రతినిధి.
