ఆర్చరీ గోల్డెన్ గర్ల్ జ్యోతి సురేఖకు మంత్రి నారా లోకేశ్ అభినందనలు

 2028 ఒలింపిక్స్ లక్ష్యంగా సాగాలని పిలుపు.. ప్రభుత్వ అండదండలు ఉంటాయని హామీ!
సూర్య అమరావతి బ్యూరో: అంతర్జాతీయ వేదికలపై భారత కీర్తిపతాకను సగర్వంగా ఎగురవేస్తూ తెలుగుజాతి గర్వించదగ్గ స్థాయికి ఎదిగిన ప్రముఖ ఆర్చర్, గోల్డెన్ గర్ల్ వెన్నం జ్యోతి సురేఖను రాష్ట్ర విద్య, ఐటీ మరియు ఎలక్ట్రానిక్స్ శాఖ మంత్రి నారా లోకేశ్ ఘనంగా అభినందించారు. జపాన్‌లో జరిగిన ఏషియన్ గేమ్స్‌లో ఆర్చరీ కాంపౌండ్ మహిళల టీమ్ విభాగంలో అద్భుత ప్రదర్శన కనబరిచి స్వర్ణ పతకం సాధించిన జ్యోతి సురేఖ, ఆమె తండ్రి సురేంద్రకుమార్‌లు సోమవారం ఉండవల్లిలోని మంత్రి నివాసంలో మర్యాదపూర్వకంగా కలిశారు.

ఈ సందర్భంగా జ్యోతి సురేఖను మంత్రి శాలువాతో సత్కరించి ప్రత్యేకంగా అభినందనలు తెలిపారు. ఆర్చరీ విభాగంలో అంతర్జాతీయ స్థాయి క్రీడాకారులతో హోరాహోరీగా తలపడి పసిడి పతకం సాధించడం ద్వారా మన దేశానికే కాకుండా ఆంధ్రప్రదేశ్ రాష్ట్రానికి ఎనలేని ఖ్యాతిని తీసుకువచ్చారని ప్రశంసించారు. ప్రతికూల పరిస్థితులను అధిగమించి నిలకడగా రాణిస్తూ దేశానికి పతకాలు అందిస్తున్న ఆమె కృషి యువ క్రీడాకారులకు స్ఫూర్తిదాయకమని పేర్కొన్నారు.

రాబోయే 2028 ఒలింపిక్స్‌లో పతకం సాధించడమే లక్ష్యంగా కఠోర సాధన చేయాలని, ఒలింపిక్ వేదికపై బంగారు పతకం ముద్దాడేలా ముందుకు సాగాలని జ్యోతి సురేఖకు మంత్రి ఆకాంక్షించారు. ఆమె శిక్షణ, అంతర్జాతీయ పోటీల సన్నద్ధతకు అవసరమైన అన్ని రకాల సహాయ సహకారాలను కూటమి ప్రభుత్వం అందిస్తుందని, ప్రతిభావంతులైన క్రీడాకారులను ప్రోత్సహించడంలో ప్రభుత్వం ఎల్లప్పుడూ ముందంజలో ఉంటుందని హామీ ఇచ్చారు. ఈ భేటీపై జ్యోతి సురేఖ కుటుంబ సభ్యులు హర్షం వ్యక్తం చేస్తూ మంత్రికి కృతజ్ఞతలు తెలిపారు.