గ్రామాల్లో పేరుకుపోతున్న చెత్త.. బాలికల హాస్టల్, గ్రంథాలయం సమీపంలోనే వ్యర్థాల పారబోత!

వెల్దుర్తి ప్రతినిధి మేజర్ న్యూస్ మండల పరిశుభ్రత లోపించి గ్రామంలోని వీధులు దుర్గంధభరితంగా మారుతున్నాయి. ఊరి చివరన కానీ, కేటాయించిన ప్రాసెసింగ్ యార్డుల్లో కానీ పారబోయాల్సిన చెత్తను అధికారుల నిర్లక్ష్యం వల్ల నేరుగా బాలికల హాస్టల్, స్థానిక గ్రంథాలయం సమీపంలోనే కుప్పలుగా పారబోస్తున్నారు. దీనివల్ల ఇటు విద్యార్థినులు, అటు పాఠకులు తీవ్ర ఇబ్బందులు ఎదుర్కొంటున్నారు.

పేరుకుపోతున్న రోగాలు - ఆందోళనలో విద్యార్థినులు

బాలికల హాస్టల్ పరిసరాల్లో చెత్త కుప్పలు పేరుకుపోవడంతో ఆ ప్రాంతమంతా ఈగలు, దోమలు, పందులకు నిలయంగా మారింది. దోమల తీవ్రత పెరిగి డెంగ్యూ, మలేరియా వంటి ప్రమాదకర సాంక్రామిక రోగాలు వ్యాపించే అవకాశం ఉందని హాస్టల్ విద్యార్థినులు, వారి తల్లిదండ్రులు తీవ్ర ఆందోళన వ్యక్తం చేస్తున్నారు.

చదువుపై తీవ్ర ప్రభావం

మరోవైపు గ్రంథాలయానికి వచ్చే పాఠకులు, హాస్టల్లో ఉంటూ చదువుకునే విద్యార్థినులకు నిరంతరం వచ్చే దుర్గంధం వల్ల చదువుపై ఏకాగ్రత నిలపలేకపోతున్నారు. వెంటనే సంబంధిత అధికారులు స్పందించి, హాస్టల్ మరియు గ్రంథాలయం వద్ద ఉన్న చెత్తను తొలగించి, నిర్దేశిత ప్రాసెసింగ్ యార్డుకు తరలించేలా చర్యలు తీసుకోవాలని గ్రామస్తులు డిమాండ్ చేస్తున్నారు.

సూర్య ప్రతినిధి షేక్ దస్తగిరి వెల్దుర్తి మండలం కర్నూలు జిల్లా