బస్సు టాప్ పై విద్యార్థులు.. తాకే దూరంలో విద్యుత్ తీగలు.

కళ్యాణదుర్గం టౌన్ ప్రతినిధి :-

శెట్టూరు మండలం చింతర్లపల్లి వంక దాటిన అనంతరం మలుపు సమీపంలో పెను ప్రమాదం తప్పింది. విద్యుత్ తీగలు బస్సు టాపుపై ప్రయాణిస్తున్న విద్యార్థులకు తాకేంత సమీపంలో ఉండటంతో తీవ్ర ఉద్రిక్తత నెలకొంది. అదే సమయంలో రహదారిపై వెళ్తున్న వాహనదారులు పరిస్థితిని గమనించి బస్సు డ్రైవర్‌ను అప్రమత్తం చేయడంతో డ్రైవర్ వెంటనే బస్సును నిలిపివేశాడు. దీంతో విద్యార్థులు, ప్రయాణికులు ఊపిరిపీల్చుకున్నారు. కళ్యాణదుర్గం డిపోకు చెందిన ఈ బస్సులో కనుకూరు, ముచ్చర్లపల్లి, కరిడిపల్లి, చింతర్లపల్లి గ్రామాలకు చెందిన విద్యార్థులు నిత్యం శెట్టూరులోని పాఠశాలలకు రాకపోకలు సాగిస్తుంటారు. విద్యార్థుల ప్రయాణ సౌకర్యం కోసం బస్సును ఏర్పాటు చేసినప్పటికీ, అదే బస్సులో సాధారణ ప్రయాణికులను కూడా అధిక సంఖ్యలో ఎక్కించుకోవడంతో రద్దీ పెరుగుతోందని స్థానికులు చెబుతున్నారు. సోమవారం బస్సు లోపల ప్రయాణికులతో పూర్తిగా నిండిపోవడంతో కొంతమంది విద్యార్థులు తప్పనిసరి పరిస్థితుల్లో బస్సు టాపుపైకి ఎక్కి ప్రయాణించారు. ఈ క్రమంలో చింతర్లపల్లి వంక దాటిన తర్వాత మలుపు వద్ద రహదారికి అడ్డంగా ఉన్న విద్యుత్ తీగలు బస్సు టాపుపై ఉన్న విద్యార్థులకు అత్యంత సమీపంగా వచ్చాయి. వాహనదారులు వెంటనే డ్రైవర్‌ను అప్రమత్తం చేయడంతో ప్రమాదం తప్పింది. ఒక్క క్షణం ఆలస్యమైనా విద్యుత్ తీగలు విద్యార్థులను తాకి ప్రాణనష్టం జరిగే ప్రమాదం ఉండేదని ప్రత్యక్ష సాక్షులు ఆందోళన వ్యక్తం చేశారు. విద్యార్థుల భద్రతను దృష్టిలో ఉంచుకుని బస్సు రద్దీని నియంత్రించడంతో పాటు అవసరమైన మేరకు అదనపు సర్వీసులు ఏర్పాటు చేయాలని విద్యార్థుల తల్లిదండ్రులు, గ్రామస్థులు కోరుతున్నారు. విద్యార్థులు బస్సు టాపుపై ప్రయాణించకుండా అధికారులు చర్యలు తీసుకోవడంతో పాటు ప్రమాదకరంగా ఉన్న విద్యుత్ తీగలను సంబంధిత అధికారులు పరిశీలించి సురక్షితమైన ఎత్తులో ఏర్పాటు చేయాలని వారు విజ్ఞప్తి చేస్తున్నారు.