ఈసీఎల్‌జీఎస్ 5.0 కింద బ్యాంక్ రుణాల విడుదలను వేగవంతం చేయండి:
కేంద్రం సాయం కోరిన భారత విమానయాన సంస్థలు
సూర్య బిజినెస్ డెస్క్: ఎమర్జెన్సీ క్రెడిట్ లైన్ గ్యారెంటీ స్కీమ్ కింద ఇప్పటికే మంజూరైన అత్యవసర రుణ నిధులను బ్యాంకుల నుంచి త్వరితగతిన విడుదల చేయించేలా చొరవ చూపాలని దేశీయ విమానయాన సంస్థలు కేంద్ర ప్రభుత్వాన్ని ఆశ్రయించాయి. ఈ మేరకు ఫెడరేషన్ ఆఫ్ ఇండియన్ ఎయిర్‌లైన్స్ కేంద్ర పౌర విమానయాన మంత్రిత్వ శాఖకు లేఖ రాస్తూ, బ్యాంకులు మిగిలిన నిధులను ఎలాంటి జాప్యం లేకుండా పంపిణీ చేసేలా తగిన మార్గదర్శకాలు, భరోసా కల్పించాలని విజ్ఞప్తి చేసింది.
పశ్చిమాసియా సంక్షోభం, గగనతల ఆంక్షలు, అంతర్జాతీయంగా పెరిగిన విమాన ఇంధన ధరల భారం నుంచి విమానయాన రంగాన్ని, చిన్న-మధ్యతరహా పరిశ్రమలను గట్టెక్కించేందుకు కేంద్ర కేబినెట్ రూ. 18,100 కోట్ల కేటాయింపుతో ఈసీఎల్‌జీఎస్ 5.0ను ఆమోదించింది. ఇందులో విమానయాన రంగానికి దాదాపు రూ. 5,000 కోట్ల రుణ పరపతికి మార్గం సుగమమైంది. ఒక్కో ఎయిర్‌లైన్ గరిష్టంగా రూ. 1,500 కోట్ల వరకు అదనపు రుణాన్ని పొందే అవకాశం ఉండగా, నేషనల్ క్రెడిట్ గ్యారెంటీ ట్రస్టీ కంపెనీ ద్వారా 90 శాతం వరకు క్రెడిట్ గ్యారెంటీ కవరేజీని ప్రభుత్వం అందిస్తోంది.
అయితే, నిధుల విడుదలలో బ్యాంకుల వైపు నుంచి ఎదురవుతున్న తీవ్ర జాప్యం వల్ల సంస్థలు తీవ్ర లిక్విడిటీ కొరతను ఎదుర్కొంటున్నాయని ఎయిర్‌లైన్స్ ఆవేదన వ్యక్తం చేశాయి. రోజువారీ విమాన కార్యకలాపాలు, విడిభాగాల కొనుగోళ్లు, నిర్వహణ మూలధనం (వర్కింగ్ క్యాపిటల్) మరియు విమాన సర్వీసులు నిరంతరాయంగా కొనసాగేందుకు ఈ రుణ నిధులు సకాలంలో అందడం అత్యంత కీలకమని ఎఫ్ఐఏ స్పష్టం చేసింది. శీతాకాల షెడ్యూల్ ప్రారంభం కానున్న ప్రస్తుత తరుణంలో నిధులు వేగంగా అందకపోతే దేశీయ కనెక్టివిటీపై ప్రభావం పడే ప్రమాదం ఉందని హెచ్చరిస్తూ, తక్షణమే బ్యాంకింగ్ రంగంతో సమన్వయం చేసి నిధుల విడుదలను వేగవంతం చేయాలని కేంద్రాన్ని కోరాయి.
