చర్మానికి ఇన్స్టంట్ గ్లో రావాలా? పసుపు ఐస్ క్యూబ్స్‌తో ఇలా మ్యాజిక్ చేయండి!
సూర్య లైఫ్‌స్టైల్ డెస్క్: ప్రస్తుత ఉరుకులు పరుగుల జీవితంలో ముఖంపై నిస్సత్తువు కమ్ముకోవడం, వాతావరణ కాలుష్యం కారణంగా కాంతిని కోల్పోవడం వంటి చర్మ సమస్యలతో చాలా మంది ఇబ్బంది పడుతుంటారు. పార్లర్లకు వెళ్లి ఖరీదైన చికిత్సలు తీసుకునే బదులు, వంటింట్లో లభించే సహజసిద్ధమైన వస్తువులతో చర్మాన్ని సంరక్షించుకోవడం ఎంతో ఉత్తమమని సౌందర్య నిపుణులు సూచిస్తున్నారు. ముఖ్యంగా చర్మానికి తక్షణ కాంతిని అందించడంలో పసుపు అద్భుతంగా పనిచేస్తుంది. పసుపులో ఉండే యాంటీ ఆక్సిడెంట్ మరియు యాంటీ ఇన్ఫ్లమేటరీ గుణాలు చర్మంపై ఉన్న మృతకణాలను తొలగించి, ముఖానికి సహజమైన మెరుపును తీసుకొస్తాయి. ఈ ప్రయోజనాలను మరింత సులభంగా చర్మానికి అందించేందుకు ప్రస్తుతం పసుపుతో తయారుచేసే ఐస్ క్యూబ్స్ విధానం సోషల్ మీడియాలో విపరీతంగా ట్రెండ్ అవుతోంది.
ఇంట్లోనే పసుపు ఐస్ క్యూబ్స్ తయారు చేసుకోవడం చాలా సులభం మరియు దీనికోసం పెద్దగా శ్రమించాల్సిన అవసరం లేదు. ముందుగా ఒక గిన్నెలో తగినన్ని నీటిని తీసుకుని అందులో చిటికెడు స్వచ్ఛమైన పసుపు పొడిని కలపాలి. దీనికి అదనంగా చర్మానికి మంచి తేమను అందించే కొద్దిగా రోజ్ వాటర్ లేదా పచ్చి పాలను జోడించి బాగా మిశ్రమంలా కలపాలి. ఈ మిశ్రమాన్ని ఐస్ ట్రేలో పోసి ఫ్రీజర్‌లో గడ్డకట్టే వరకు ఉంచాలి. ఇలా తయారైన పసుపు ఐస్ క్యూబ్స్‌‌ను ఒక మృదువైన కాటన్ వస్త్రంలో చుట్టి ముఖంపై సున్నితంగా మర్దన చేసుకోవాలి.
ఈ విధంగా పసుపు ఐస్ క్యూబ్స్‌తో ముఖాన్ని మర్దన చేయడం వల్ల చర్మంపై రక్త ప్రసరణ వేగవంతమై మొఖం కాంతివంతంగా మారుతుంది. అంతేకాకుండా ఎండ వల్ల చర్మం కందిపోవడం, మొటిమలు మరియు వాటి వల్ల ఏర్పడే నల్లటి మచ్చలు క్రమంగా తగ్గిపోతాయి. కెమికల్స్ ఉండే రకరకాల క్రీమ్‌లను వాడటం వల్ల చర్మం దెబ్బతినే ప్రమాహం ఉంటుంది కాబట్టి, ఇలాంటి సహజసిద్ధమైన ఇంటి చిట్కాలను అనుసరించడం వల్ల ఎలాంటి దుష్ప్రభావాలు లేకుండా నిగనిగలాడే అందమైన చర్మాన్ని సొంతం చేసుకోవచ్చు.
Also Read: మహాకావ్య శ్రీ రామాయణ కథ సినిమాపై నెగెటివ్ మార్కెటింగ్ ప్రచారం: నిర్మాత ప్రకాష్ మహోబియా సంచలన ఆరోపణలు
