డిజిటల్ భారత్‌లో సరికొత్త రికార్డు: 109 కోట్లు దాటిన ఇంటర్నెట్ వినియోగదారులు.. ట్రాయ్ వార్షిక నివేదికలో వెల్లడి!
సూర్య బిజినెస్ డెస్క్: భారతదేశంలో డిజిటల్ విప్లవం సరికొత్త మైలురాళ్లను అధిగమిస్తూ దూసుకుపోతోంది. దేశంలో ఇంటర్నెట్ వినియోగదారుల సంఖ్య 2025-26 ఆర్థిక సంవత్సరంలో (FY26) రికార్డు స్థాయిలో 1.09 బిలియన్ల (109.28 కోట్లు) మార్కును దాటినట్లు టెలికాం నియంత్రణ సంస్థ ‘ట్రాయ్’ (TRAI) తన వార్షిక పనితీరు నివేదికలో అధికారికంగా వెల్లడించింది. అంతకుముందు ఏడాదితో పోలిస్తే ఇంటర్నెట్ చందాదారుల సంఖ్యలో ఏకంగా 12.76 శాతం వార్షిక వృద్ధి నమోదైంది. హైస్పీడ్ 4జీ, 5జీ సేవల విస్తరణ ఫలితంగా బ్రాడ్‌బ్యాండ్ వినియోగదారుల సంఖ్య 106.58 కోట్లకు చేరుకోవడం విశేషం.
దేశంలో డేటా వినియోగం మునుపెన్నడూ లేని రీతిలో భారీగా పెరిగింది. వైర్‌లెస్ డేటా వాడకం ఏడాది ప్రాతిపదికన 24.74 శాతం ఎగబాకి 2,85,376 పెటాబైట్లకు చేరింది. ఒక్కో వినియోగదారుడి సగటు నెలవారీ మొబైల్ డేటా వినియోగం (యావరేజ్ డేటా యూసేజ్) 21.53 జీబీ నుంచి 25.51 జీబీకి పెరిగి సరికొత్త రికార్డును సృష్టించింది. ఈ భారీ డేటా వినియోగం కారణంగా టెలికాం ఆపరేటర్ల వైర్‌లెస్ డేటా ఆదాయం 11.53 శాతం పెరిగి రూ. 2.39 లక్షల కోట్లకు చేరింది. ఫలితంగా టెలికాం కంపెనీల యావరేజ్ రెవెన్యూ పర్ యూజర్ (ARPU) సైతం గతంలో ఉన్న రూ. 174.46 నుంచి రూ. 180.73 కు పెరిగింది.
మరోవైపు దేశంలో మొత్తం టెలిఫోన్ కనెక్షన్ల సంఖ్య 10.81 శాతం వృద్ధితో 133 కోట్లకు (1.33 బిలియన్లు) చేరినట్లు ట్రాయ్ పేర్కొంది. దీంతో జాతీయ స్థాయిలో టెలి-సాంద్రత (టెలి-డెన్సిటీ) 93.26 శాతానికి మెరుగైంది. పట్టణ ప్రాంతాల్లో టెలి-డెన్సిటీ 151.47 శాతంగా ఉండగా, గ్రామీణ ప్రాంతాల్లో 60.46 శాతానికి చేరింది. ఆన్‌లైన్ సేవలు, యూపీఐ డిజిటల్ చెల్లింపులు, ఓటీటీ వినోదం మరియు ఈ-కామర్స్ విస్తరణ టెలికాం రంగాన్ని ఆర్థిక వ్యవస్థలో అత్యంత కీలక చోదకశక్తిగా నిలబెడుతున్నాయని మార్కెట్ నిపుణులు విశ్లేషిస్తున్నారు.
