ఎన్నికల కమిషన్ నిర్ణయాలకు వ్యతిరేకంగా కళ్యాణదుర్గంలో కాంగ్రెస్ నిరసన.

కళ్యాణదుర్గం టౌన్ ప్రతినిధి :-

భారత ఎన్నికల కమిషన్ తీసుకుంటున్న పలు నిర్ణయాలను నిరసిస్తూ కళ్యాణదుర్గం నియోజకవర్గ కాంగ్రెస్ పార్టీ ఆధ్వర్యంలో బుధవారం నిరసన కార్యక్రమం నిర్వహించనున్నారు. అక్టోబర్ 7వ తేదీ బుధవారం ఉదయం 10 గంటలకు కళ్యాణదుర్గం పట్టణంలోని గాంధీ చౌక్ నుంచి ఆర్డీవో కార్యాలయం వరకు ర్యాలీ నిర్వహించనున్నట్లు కాంగ్రెస్ పార్టీ నాయకులు తెలిపారు. ఈ కార్యక్రమానికి కాంగ్రెస్ పార్టీ సీడబ్ల్యూసీ సభ్యుడు రఘువీరారెడ్డి ముఖ్య అతిథిగా హాజరుకానున్నారు. ఎన్నికల కమిషన్ నిర్ణయాలపై నిరసన వ్యక్తం చేయడంతో పాటు ప్రజాస్వామ్య పరిరక్షణకు కాంగ్రెస్ పార్టీ చేపడుతున్న కార్యక్రమాల్లో భాగంగా ఈ ర్యాలీ నిర్వహిస్తున్నట్లు తెలిపారు. కార్యక్రమానికి నియోజకవర్గంలోని కాంగ్రెస్ పార్టీ నాయకులు, కార్యకర్తలు, రాహుల్ గాంధీ, రఘువీరారెడ్డి అభిమానులు పెద్ద సంఖ్యలో హాజరై కార్యక్రమాన్ని విజయవంతం చేయాలని కోరారు. అనంతరం ఉదయం 11 గంటలకు స్థానిక ఆర్టీసీ బస్టాండ్ సమీపంలోని కరణం భవన్‌లో కాంగ్రెస్ పార్టీ సీనియర్ నాయకుడు, స్వర్గీయ మాల ఎర్రిస్వామి సంస్మరణ సభ నిర్వహించనున్నట్లు తెలిపారు. ఆయన సేవలను స్మరించుకుంటూ నిర్వహించే ఈ కార్యక్రమానికి కాంగ్రెస్ నాయకులు, కార్యకర్తలు, అభిమానులు హాజరై నివాళులు అర్పించాలని విజ్ఞప్తి చేశారు. ఒకే రోజు నిర్వహించనున్న నిరసన ర్యాలీ, సంస్మరణ సభ కార్యక్రమాల్లో కాంగ్రెస్ శ్రేణులు పెద్ద సంఖ్యలో పాల్గొని విజయవంతం చేయాలని కళ్యాణదుర్గం నియోజకవర్గ కాంగ్రెస్ పార్టీ కోరింది.