చిన్నారులకు పౌష్టికాహారం.. ‘తొలి ముద్ద’కు శ్రీకారం

అంగన్‌వాడీ కేంద్రాల్లో అల్పాహారం అందించే కార్యక్రమం ప్రారంభం

వికారాబాద్, మేజర్ న్యూస్ (అక్టోబర్ 2):చిన్నారులకు పౌష్టికాహారం అందించి వారి సంపూర్ణ వికాసానికి తోడ్పడే లక్ష్యంతో తెలంగాణ రాష్ట్ర ప్రభుత్వం చేపట్టిన ‘తొలి ముద్ద’ కార్యక్రమాన్ని వికారాబాద్‌లో ప్రారంభించారు. మహిళా శిశు సంక్షేమ శాఖ వికారాబాద్ ఆధ్వర్యంలో వికారాబాద్ మున్సిపాలిటీ పరిధిలోని రామయ్యగూడ అంగన్‌వాడీ కేంద్రాల్లో ఈ కార్యక్రమాన్ని నిర్వహించారు.ఈ కార్యక్రమానికి జడ్పీ సీఈఓ సుధీర్ ముఖ్య అతిథిగా హాజరై చిన్నారులకు పౌష్టికాహారంతో కూడిన అల్పాహారాన్ని అందించి కార్యక్రమాన్ని ప్రారంభించారు. ఈ సందర్భంగా ఆయన మాట్లాడుతూ.. చిన్నారుల శారీరక, మానసిక, భావోద్వేగ వికాసానికి సమతుల్యమైన పోషకాహారం ఎంతో అవసరమన్నారు. అంగన్‌వాడీ కేంద్రాల ద్వారా చిన్నారులకు నాణ్యమైన పౌష్టికాహారం అందించడంతో పాటు వారి ఆరోగ్యం, ఎదుగుదలపై ప్రత్యేక శ్రద్ధ తీసుకోవాలని సూచించారు.ప్రభుత్వం చేపట్టిన ‘తొలి ముద్ద’ కార్యక్రమం ద్వారా చిన్నారులకు రోజువారీ పోషక అవసరాలను తీర్చే విధంగా అల్పాహారం అందించడం జరుగుతుందని అధికారులు తెలిపారు. చిన్నారుల్లో పోషకాహార లోపాన్ని నివారించడంతో పాటు ఆరోగ్యకరమైన ఎదుగుదలకు ఈ కార్యక్రమం దోహదపడుతుందని పేర్కొన్నారు.ఈ కార్యక్రమంలో వికారాబాద్ మున్సిపల్ వైస్ చైర్మన్ అర్ధా సుధాకర్ రెడ్డి, 19వ వార్డు కౌన్సిలర్ జగదీశ్వరి, మహిళా శిశు సంక్షేమ శాఖ అధికారి కె. కాంతారావు, సీడీపీఓ ఈ. శ్రీలత, సూపర్‌వైజర్ షాలిని, అంగన్‌వాడీ సిబ్బంది తదితరులు పాల్గొన్నారు.