బెండార ప్రభుత్వ డిగ్రీ కళాశాలలో బతుకమ్మ సంబరాలు

సూర్య వాంకిడి,  బెండారలోని ప్రభుత్వ డిగ్రీ కళాశాలలో ముందస్తు బతుకమ్మ వేడుకలను గురువారం ఘనంగా నిర్వహించారు. ఈ సందర్భంగా కళాశాల ఆవరణలో విద్యార్థులు రంగురంగుల పూలతో బతుకమ్మలను పేర్చి, సంప్రదాయబద్ధంగా బతుకమ్మ పాటలు పాడుతూ సందడి చేశారు. విద్యార్థుల ఉత్సాహంతో కళాశాల ప్రాంగణం పండుగ వాతావరణాన్ని సంతరించుకుంది.కళాశాల ప్రిన్సిపాల్ డాక్టర్ ఎం. కనకయ్య, ఇన్‌చార్జ్ లెక్చరర్ సంధ్యతో పాటు అధ్యాపకులు, విద్యార్థులు వేడుకల్లో పాల్గొన్నారు. తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగను విద్యార్థులు ఉత్సాహంగా జరుపుకున్నారు. ఈ సందర్భంగా బతుకమ్మ ప్రాధాన్యతను వివరించి, మన సంస్కృతి, సంప్రదాయాలను భావితరాలకు అందించాల్సిన బాధ్యత ప్రతి ఒక్కరిపై ఉందని పేర్కొన్నారు.