అగ్రిగోల్డ్ బాధితులు ఒరిజినల్ పత్రాలతో హాజరు కావాలి

నేటి దినపత్రిక సూర్య బ్యూరో రాజమహేంద్రవరం

అగ్రిగోల్డ్ డిపాజిటర్లకు న్యాయం, ఉపశమనం కల్పించేందుకు రాష్ట్ర ప్రభుత్వం చేపట్టిన చర్యల్లో భాగంగా బాధితులు, డిపాజిటర్లు, ఏజెంట్ల వద్ద ఉన్న అగ్రిగోల్డ్ అసలు బాండ్లు, రసీదుల పరిశీలనకు ప్రత్యేక కేంద్రాలు ఏర్పాటు చేసినట్లు కడియం పోలీస్ స్టేషన్ సీఐ ఏ. వెంకటేశ్వరరావు ఒక ప్రకటనలో తెలిపారు.

తూర్పుగోదావరి జిల్లాకు సంబంధించి రాజమహేంద్రవరంలోని జిల్లా పోలీస్ కార్యాలయంలో అక్టోబర్ 9, 10 తేదీల్లో ఉదయం 10 గంటల నుంచి సాయంత్రం 5 గంటల వరకు పత్రాల పరిశీలన జరుగుతుందని పేర్కొన్నారు. ప్రభుత్వ సెలవులు, ఆదివారాల్లో పరిశీలన ఉండదన్నారు.

డిపాజిటర్ స్వయంగా హాజరయ్యే వారు అసలు బాండ్ లేదా నగదు రసీదు, దాని సంతకం చేసిన రంగు జిరాక్స్, ఆధార్, పాన్ కార్డు, బ్యాంకు పాస్‌బుక్ మొదటి పేజీ, పాస్‌పోర్టు ఫొటో, మొబైల్ నంబర్ తీసుకురావాలని సూచించారు. డిపాజిటర్ మరణించిన సందర్భంలో నామినీ లేదా చట్టబద్ధ వారసులు హాజరయ్యే వారు సంబంధిత మరణ ధ్రువపత్రాలు, వారసత్వాన్ని నిర్ధారించే పత్రాలతో పాటు అవసరమైన గుర్తింపు, బ్యాంకు పత్రాలు తీసుకురావాలని తెలిపారు.

డిపాజిటర్ స్వయంగా రాలేని పరిస్థితుల్లో కుటుంబ సభ్యులు హాజరైతే అధికారిక అనుమతి పత్రం, కుటుంబ సంబంధాన్ని నిరూపించే పత్రాలు సమర్పించాల్సి ఉంటుందని సీఐ వివరించారు. ఏజెంట్ల ద్వారా బాండ్లు సమర్పించే వారు ఏజెంట్ గుర్తింపు సంఖ్య లేదా కోడ్‌తో పాటు ఆధార్, పాన్, బ్యాంకు పాస్‌బుక్, ఫొటో, మొబైల్ నంబర్ అందించాలన్నారు.

అసలు బాండ్లను అధికారులకు అప్పగించాల్సిన అవసరం లేదని, కేవలం పరిశీలన కోసం మాత్రమే చూపించాలని సీఐ ఏ. వెంకటేశ్వరరావు స్పష్టం చేశారు. రంగు జిరాక్స్‌పై బాండ్ నంబర్ సహా వివరాలు స్పష్టంగా ఉండి, సంబంధిత వ్యక్తి సంతకం చేయాలని సూచించారు. పత్రాలు సమర్పించిన అనంతరం డిపాజిటర్లకు రసీదు అందజేస్తారని తెలిపారు.

సంబంధిత మండలాలకు కేటాయించిన తేదీల వివరాలను ముద్రిత, ఎలక్ట్రానిక్ మీడియా, వాట్సాప్ గ్రూపుల ద్వారా తెలియజేస్తారని సీఐ ఏ. వెంకటేశ్వరరావు ఆ ప్రకటనలో పేర్కొన్నారు.