ఆలస్యం, నిర్లక్ష్యం చేస్తే చర్యలు ఖాయం : కలెక్టర్

- 65 అర్జీలు… రెవెన్యూ వాటా 25

- పెండింగ్ ఫైళ్లపై ప్రత్యేక ఫోకస్

- సమస్యల పరిష్కారానికి దిశానిర్దేశం

-నిర్లక్ష్య అధికారులకు ‘వార్నింగ్’

జిల్లాలో ప్రజావాణి అర్జీల పరిష్కారంలో ఎలాంటి ఆలస్యం, నిర్లక్ష్యం సహించబోమని జిల్లా కలెక్టర్ సి. నారాయణ రెడ్డి హెచ్చరించారు. సమీకృత జిల్లా కార్యాలయాల సముదాయం సమావేశ మందిరంలో సోమవారం నిర్వహించిన ప్రజావాణి కార్యక్రమంలో అధికారులకు ఆయన గట్టి ఆదేశాలు జారీ చేశారు. మొత్తం 65 అర్జీలు అందగా, అందులో రెవెన్యూ శాఖకు చెందినవి 25, ఇతర శాఖలకు సంబంధించినవి 40గా నమోదయ్యాయి. వివిధ ప్రాంతాల నుంచి వచ్చిన ప్రజలు తమ సమస్యలను కలెక్టర్ దృష్టికి తీసుకువచ్చారు. ఈ సందర్భంగా కలెక్టర్ మాట్లాడుతూ… ప్రజల సమస్యల పరిష్కారం ప్రభుత్వానికి అత్యంత ప్రాధాన్యమని స్పష్టం చేశారు. ప్రజావాణి ద్వారా వచ్చిన ప్రతి ఫిర్యాదుపై అధికారులు వెంటనే స్పందించి, నిబంధనల ప్రకారం వేగంగా పరిష్కరించాలని ఆదేశించారు. ప్రతి అర్జీని క్షుణ్ణంగా పరిశీలించి ఫిర్యాదుదారులకు న్యాయం జరిగేలా చర్యలు తీసుకోవాలని సూచించారు. మండల, డివిజన్ స్థాయిలో జరిగే ప్రజావాణి సమావేశాలకు అధికారులు తప్పనిసరిగా హాజరు కావాలని స్పష్టం చేశారు. జిల్లా కేంద్రానికి రావాల్సిన అవసరం లేకుండా స్థానికంగానే సమస్యలు పరిష్కరించే విధంగా చర్యలు తీసుకోవాలని సూచించారు. డివిజన్ స్థాయిలో స్వీకరించిన అర్జీలను వెంటనే నమోదు చేసి పరిష్కార ప్రక్రియ ప్రారంభించాలని ఆదేశించారు. పెండింగ్‌లో ఉన్న అర్జీలపై ప్రత్యేక దృష్టి సారించాలని, నిర్ణీత గడువులో పూర్తి చేయాలని కలెక్టర్ హెచ్చరించారు. నిర్లక్ష్యం ప్రదర్శించిన అధికారులపై కఠిన చర్యలు తప్పవని స్పష్టం చేశారు. ఈ కార్యక్రమంలో అదనపు కలెక్టర్లు డాక్టర్ కె. కిరణ్మయి, చంద్రా రెడ్డి, స్టేట్ ప్రజావాణి కోఆర్డినేటర్ రాకేష్, వివిధ శాఖల జిల్లా అధికారులు పాల్గొన్నారు.

(రంగారెడ్డి - మేజర్ న్యూస్)