వినియోగదారులను తప్పుదోవ పట్టిస్తున్నారు...పెప్సికో, మాన్స్టర్‌పై ఎఫ్‌ఎస్‌ఎస్‌ఏఐ ఆరోపణలు
సూర్య జాతీయ డెస్క్: ప్రముఖ బేవరేజ్ దిగ్గజాలు పెప్సికో మరియు మాన్స్టర్ బెవరేజ్ కంపెనీలపై భారతీయ ఆహార భద్రతా ప్రమాపాల ప్రాధికార సంస్థ (FSSAI) తీవ్రమైన ఆరోపణలు గుప్పించింది. అధిక కెఫీన్ కలిగిన తమ ఉత్పత్తులను 'ఎనర్జీ డ్రింక్స్' పేరుతో మార్కెట్ చేసి వినియోగదారులను ఉద్దేశపూర్వకంగా తప్పుదోవ పట్టిస్తున్నాయని (డూప్ చేస్తున్నాయని) ఢిల్లీ హైకోర్టుకు సమర్పించిన అఫిడవిట్‌లో స్పష్టం చేసింది. దేశంలో ఎనర్జీ డ్రింక్స్ కేటగిరీకి సంబంధించి ఎప్పుడూ అధికారిక ప్రమాణాలు నిర్ధారించబడలేదని ఎఫ్‌ఎస్‌ఎస్‌ఏఐ కోర్టు దృష్టికి తీసుకువచ్చింది.
అధిక మొత్తంలో కెఫీన్, చక్కెర మరియు టౌరిన్ వంటి అమైనో ఆమ్లాలు కలిగి ఉండే పానీయాలను ఎనర్జీ డ్రింక్స్‌గా లేబుల్ చేయడం ద్వారా ప్రజల ఆరోగ్యంపై తీవ్ర ప్రభావం పడుతోందని ఎఫ్‌ఎస్‌ఎస్‌ఏఐ ఆందోళన వ్యక్తం చేసింది. ఈ రకమైన ఉత్పత్తుల వల్ల తీవ్రమైన ప్రజా ఆరోగ్య ముప్పులు పొంచి ఉన్నాయని, వినియోగదారుల మోసాన్ని అరికట్టేందుకే తాము ఈ చర్యలు చేపట్టాల్సి వచ్చిందని వివరించింది. నిబంధనలకు విరుద్ధంగా ఉత్పత్తులను విక్రయిస్తున్న కంపెనీలపై చట్టపరమైన చర్యలు కొనసాగుతాయని స్పష్టం చేసింది.
మరోవైపు ఈ నిబంధనలపై న్యాయస్థానాన్ని ఆశ్రయించిన పెప్సికో, మాన్స్టర్ కంపెనీలకు గతంలో ఊరట లభించినప్పటికీ, రెగ్యులేటరీ సంస్థ మాత్రం తన వాదనను గట్టిగా వినిపిస్తోంది. ఇప్పటికే మార్కెట్లో ఉన్న పాత స్టాక్‌ను విక్రయించుకోవడానికి న్యాయస్థానం అనుమతించినప్పటికీ, కొత్త స్టాక్‌పై 'ఎనర్జీ డ్రింక్' అనే లేబుల్‌ను ఉపయోగించరాదని గతంలోనే ఆదేశాలు జారీ అయ్యాయి. ఈ వివాదంపై తదుపరి విచారణను న్యాయస్థానం త్వరలోనే చేపట్టనుంది.
భారతదేశంలో వేగంగా వృద్ధి చెందుతున్న ఎనర్జీ డ్రింక్స్ మార్కెట్లో నాణ్యత, లేబులింగ్ నిబంధనలు మరియు ఆరోగ్య ప్రమాణాలపై ఈ పరిణామం తీవ్ర చర్చకు దారితీసింది. దేశవ్యాప్తంగా ఆహార భద్రతను పటిష్టం చేసేందుకు ఎఫ్‌ఎస్‌ఎస్‌ఏఐ చేపట్టిన విస్తృత నిఘా చర్యల్లో భాగంగా ఈ అంశం ప్రాధాన్యత సంతరించుకుంది. రాబోయే రోజుల్లో ఈ న్యాయపోరాటం బేవరేజ్ రంగంలోని కంపెనీల మార్కెటింగ్ వ్యూహాలపై పెద్దఎత్తున ప్రభావం చూపే అవకాశం ఉందని ఆర్థిక నిపుణులు భావిస్తున్నారు.
