టెక్నాలజీతో ఏపీ టూరిజానికి సరికొత్త హంగులు
సూర్య టూరిజం డెస్క్: ఆధునిక సాంకేతిక పరిజ్ఞానాన్ని అందిపుచ్చుకుంటూ ఆంధ్రప్రదేశ్ పర్యాటక రంగాన్ని అంతర్జాతీయ స్థాయి ప్రమాణాలతో సరికొత్తగా తీర్చిదిద్దుతున్నామని రాష్ట్ర పర్యాటక, సినిమాటోగ్రఫీ, సాంస్కృతిక శాఖ మంత్రి కందుల దుర్గేష్ స్పష్టం చేశారు. స్పెయిన్‌లోని సెవిల్లె నగరంలో జరిగిన ప్రతిష్టాత్మక 'టూరిజం ఇన్నోవేషన్ సమ్మిట్-2026'లో ఆయన ముఖ్య అతిథిగా పాల్గొన్నారు. ఆర్టిఫిషియల్ ఇంటెలిజెన్స్ (ఏఐ), క్వాంటం కంప్యూటింగ్ టెక్నాలజీలను వినియోగిస్తూ ఏపీ టూరిజం చేపట్టిన వినూత్న సంస్కరణలు, డిజిటల్ సేవలను అంతర్జాతీయ సదస్సు వేదికగా ప్రపంచ పర్యాటక నిపుణులు ప్రశంసించారు.
ఈ సందర్భంగా మంత్రి కందుల దుర్గేష్ మాట్లాడుతూ.. ముఖ్యమంత్రి నారా చంద్రబాబు నాయుడు ఆలోచనలకు అనుగుణంగా సాంకేతికతకు పెద్దపీట వేస్తూ పర్యాటక రంగంలో డిజిటల్ విప్లవానికి శ్రీకారం చుట్టామని తెలిపారు. "ఇప్పటికే భారతదేశాన్ని చూసేశామని అనుకుంటే ఒకసారి ఆంధ్రప్రదేశ్‌కు రండి.. ప్రకృతి అందాలు, ఆధ్యాత్మికత, చారిత్రక వారసత్వం, ఆధునికతల సమ్మేళనంతో మిమ్మల్ని తప్పకుండా ఆశ్చర్యపరుస్తాం" అని గ్లోబల్ ట్రావెలర్లకు పిలుపునిచ్చారు.
రాష్ట్రంలోని 130కి పైగా ప్రముఖ పర్యాటక ప్రదేశాలలో 'నివు ఏఐ' (NIVU AI), 'ఆస్క్ ఏఐ' (ASK AI) ఆధారిత క్యూఆర్ కోడ్ సేవలను అందుబాటులోకి తెచ్చామని మంత్రి వివరించారు. దీని ద్వారా ప్రపంచంలోని ఏ దేశం నుంచి వచ్చే పర్యాటకుడైనా సరే.. తమ సొంత ప్రాంతీయ/అంతర్జాతీయ భాషల్లోనే ఆయా ప్రదేశాల సమగ్ర చరిత్ర, విశేషాలను తెలుసుకునే సరికొత్త అనుభూతి లభిస్తుందన్నారు. ఏపీలో పర్యాటక పెట్టుబడులకు అపార అవకాశాలు ఉన్నాయని, అంతర్జాతీయ ట్రావెల్-టెక్ సంస్థలు, స్టార్టప్‌లు భాగస్వాములు కావాలని ఆహ్వానించారు. ఈ సందర్భంగా పలువురు ప్రముఖులకు మంత్రి చేతుల మీదుగా 'టూరిజం ఇన్నోవేషన్ అవార్డులు' ప్రదానం చేశారు. ఈ కార్యక్రమంలో ఏపీటీఏ డిప్యూటీ సీఈవో శ్రీనివాస్ తదితరులు పాల్గొన్నారు.
