తమిళనాడు పెట్టుబడుల రహస్యాలు ఏపీకి లీక్?.. 15 మంది ఉద్యోగులపై విజయ్ సర్కార్ వేటు
చెన్నై: దక్షిణాది రాష్ట్రాల మధ్య పెట్టుబడుల ఆకర్షణలో తీవ్ర పోటీ నెలకొన్న వేళ, తమిళనాడు ప్రభుత్వంలో సంచలన పరిణామం చోటుచేసుకుంది. రాష్ట్రానికి రావాల్సిన పెట్టుబడులకు సంబంధించిన అత్యంత కీలకమైన, రహస్య సమాచారాన్ని ఆంధ్రప్రదేశ్కు చేరవేశారన్న ఆరోపణలపై ముఖ్యమంత్రి విజయ్ నేతృత్వంలోని ప్రభుత్వం 15 మంది కాంట్రాక్టు ఉద్యోగులను విధుల నుంచి తొలగించింది.
రాష్ట్ర పెట్టుబడుల ప్రోత్సాహక విభాగమైన 'గైడెన్స్ తమిళనాడు' (Guidance Tamil Nadu)లో పనిచేస్తున్న ఈ 15 మంది సిబ్బందిపై పరిశ్రమల శాఖ మంత్రి ఎస్. కీర్తన వేటు వేశారు. తమిళనాడుకు వెళ్లాల్సిన కొన్ని భారీ ప్రాజెక్టులు ఇటీవల ఆంధ్రప్రదేశ్కు తరలిపోయిన నేపథ్యంలో, ఈ సమాచార లీకేజీ వ్యవహారం బయటపడటం రాజకీయంగా కలకలం రేపుతోంది. తొలగించబడిన వారిలో కొందరు ఆ తర్వాత ఆంధ్రప్రదేశ్ ఆర్థిక అభివృద్ధి మండలి (APEDB)లో చేరినట్లు వార్తలు రావడంతో ఈ వివాదం మరింత ముదిరింది.
ప్రతిపక్షాల విమర్శలు.. టీడీపీ ఖండన:
ఈ పరిణామంపై తమిళనాడులో రాజకీయ దుమారం చెలరేగింది. విజయ్ ప్రభుత్వ చర్యను ప్రతిపక్ష డీఎంకే తీవ్రంగా తప్పుబట్టింది. దశాబ్దాలుగా నిర్మించిన అత్యున్నత వ్యవస్థలను ప్రస్తుత ప్రభుత్వం అపరిపక్వ నిర్ణయాలతో దెబ్బతీస్తోందని మాజీ పరిశ్రమల శాఖ మంత్రి టీఆర్బీ రాజా విమర్శించారు. మరోవైపు, తమిళనాడు నుంచి రహస్య సమాచారాన్ని సేకరించామన్న ఆరోపణలను ఆంధ్రప్రదేశ్లో అధికారంలో ఉన్న తెలుగుదేశం పార్టీ (టీడీపీ) పూర్తిగా ఖండించింది. తమ రాష్ట్రంలో ఉన్న అనుకూల పారిశ్రామిక వాతావరణం, మెరుగైన విధానాల వల్లే పెట్టుబడిదారులు ఏపీ వైపు చూస్తున్నారని స్పష్టం చేసింది.