సరికొత్త భద్రతా సవాళ్లను ఎదుర్కొనేందుకు సన్నద్ధంగా ఉండాలి

సూర్య జాతీయ డెస్క్: మారుతున్న కాలానికి అనుగుణంగా దేశ రక్షణ రంగంలో ఎదురవుతున్న సరికొత్త సవాళ్లను తిప్పికొట్టేందుకు రక్షణ బలగాలు సర్వసన్నద్ధంగా ఉండాలని కేంద్ర రక్షణ మంత్రి రాజ్‌నాథ్ సింగ్ స్పష్టం చేశారు. పశ్చిమ బెంగాల్‌లోని బాగ్డోగ్రా ఎయిర్ ఫోర్స్ స్టేషన్‌లో దీపావళి పండుగను పురస్కరించుకుని వైమానిక దళ సిబ్బందితో ఆయన ముచ్చటించారు. సరిహద్దుల వద్ద సాంప్రదాయ యుద్ధ తంత్రాలతో పాటు సైబర్‌ దాడులు, డ్రోన్ల ముప్పు, సమాచార మార్పిడిలో వ్యూహాత్మక దాడులు పెరుగుతున్నందున త్రివిధ దళాలు మరింత అప్రమత్తంగా వ్యవహరించాలని ఆయన హితవు పలికారు.

నేటి కాలంలో శత్రువులు ప్రత్యక్ష యుద్ధానికి బదులుగా సోషల్ మీడియా ద్వారా తప్పుడు సమాచారాన్ని వ్యాప్తి చేస్తూ ప్రజల్లో, సైనికుల్లో అభద్రతాభావాన్ని సృష్టించేందుకు ప్రయత్నిస్తున్నారని రాజ్‌నాథ్ సింగ్ ఆందోళన వ్యక్తం చేశారు. స్థానిక ప్రజలతో బలగాలు సత్సంబంధాలు పెంపొందించుకోవడం ద్వారా శత్రువుల కుట్రలను సమర్థవంతంగా తిప్పికొట్టవచ్చని సూచించారు. దేశ భద్రతలో వైమానిక దళం కీలక పాత్ర పోషిస్తోందని కొనియాడారు. రక్షణ రంగంలో ఆత్మనిర్భర్ భారత్ సాధన దిశగా దేశీయ స్టార్టప్‌లు మరియు పరిశ్రమలు అత్యాధునిక సాంకేతికతను అభివృద్ధి చేస్తున్నాయని తెలిపారు. అగ్నివీరులకు సంబంధించి కేబినెట్ తీసుకున్న నూతన నిర్ణయాలు వారికి భవిష్యత్తులో మరింత ప్రయోజనకరంగా మారుతాయని పేర్కొన్నారు.