పేద న్యాయ విద్యార్థులకు, జూనియర్ న్యాయవాదులకు ఆర్థిక సాయం చేయండి

న్యూఢిల్లీ: పేదరికం కారణంగా ప్రతిభావంతులైన విద్యార్థులు న్యాయవాద వృత్తికి దూరం కాకూడదని భారత ప్రధాన న్యాయమూర్తి (సీజేఐ) జస్టిస్ సూర్యకాంత్ పిలుపునిచ్చారు. న్యాయ విద్య అభ్యసిస్తున్న పేద విద్యార్థులకు, వృత్తిలోకి కొత్తగా వస్తున్న యువ న్యాయవాదులకు చేయూతనందించాల్సిన అవసరం ఎంతైనా ఉందని ఆయన స్పష్టం చేశారు.

ఈ సందర్భంగా సీజేఐ మాట్లాడుతూ.. లా చదువుతున్న సమయంలోనే కాకుండా, ప్రాక్టీస్ మొదలుపెట్టిన తొలి 3 నుంచి 5 ఏళ్ల వరకు యువ న్యాయవాదులకు ఆర్థిక సాయం అందించడం అత్యంత ముఖ్యమని పేర్కొన్నారు. ఈ ప్రారంభ మద్దతు వారు వృత్తిలో నిలదొక్కుకోవడానికి, తమకంటూ ఒక ప్రత్యేక గుర్తింపు తెచ్చుకోవడానికి ఎంతో కీలకంగా మారుతుందని వ్యాఖ్యానించారు. అలాగే, సీనియర్ న్యాయవాదులు అందించే మార్గదర్శకత్వం (Mentorship) జూనియర్ల కెరీర్‌ను పూర్తిగా సన్మార్గంలో తిప్పగలదని తెలిపారు. ముఖ్యంగా జిల్లా కోర్టుల్లో ప్రజలకు మెరుగైన, నాణ్యమైన న్యాయ సహాయం అందించడంలో యువ న్యాయవాదుల పాత్ర ఎంతో కీలకమని ఆయన గుర్తుచేశారు.