దక్షిణ నౌకాదళ కమాండ్, ఇండియన్ నేవల్ అకాడమీని సందర్శించిన రష్యా నౌకాదళ ప్రతినిధి బృందం,

సూర్య జాతీయ డెస్క్: భారత్, రష్యా నౌకాదళ భాగస్వామ్యాన్ని మరింత బలోపేతం చేసే దిశగా, రష్యా నౌకాదళానికి చెందిన ఆరుగురు సభ్యుల ప్రతినిధి బృందం కేరళలోని దక్షిణ నౌకాదళ కమాండ్, ఇండియన్ నేవల్ అకాడమీని సందర్శించింది. క్యాప్టెన్ 1st ర్యాంక్ సెర్గీ వీ సైతోవ్ నేతృత్వంలోని ఈ బృందం సెప్టెంబర్ 27 నుంచి అక్టోబర్ 1 వరకు భారత పర్యటనలో ఉందని భారత నౌకాదళం తెలిపింది.

పర్యటన సందర్భంగా రష్యా బృందం భారత నౌకాదళ మొత్తం శిక్షణ వ్యవస్థ, మౌలిక సదుపాయాలు, సౌకర్యాలను నేరుగా పరిశీలించింది. సముద్ర సహకారాన్ని మరింత పెంచుకునే మార్గాలపై, పరస్పర ఆసక్తి గల అంశాలపై ఇరుపక్షాల మధ్య చర్చలు జరిగాయి. నౌకాదళ శిక్షణ, సంస్థాగత బంధాలు, పరస్పర కార్యాచరణ సమన్వయం ఈ చర్చల్లో కీలకాంశాలుగా నిలిచాయి. ఈ వివరాలను భారత నౌకాదళం శనివారం సామాజిక మాధ్యమం ద్వారా వెల్లడించింది.

కొచ్చి కేంద్రంగా పనిచేసే దక్షిణ నౌకాదళ కమాండ్ భారత నౌకాదళ శిక్షణ కమాండ్. అధికారులు, నావికులందరికీ ప్రాథమిక దశ నుంచి ఉన్నత దశ వరకు శిక్షణ ఇచ్చే బాధ్యత ఈ కమాండ్‌దే. కేరళలోని ఎళిమలలో ఉన్న ఇండియన్ నేవల్ అకాడమీ ఈ కమాండ్ పరిధిలోనే ఉంది. నౌకాదళం, తీరరక్షక దళంలోకి వచ్చే అధికారులందరికీ ఇక్కడే ప్రాథమిక శిక్షణ ఇస్తారు. ఈ అకాడమీని 2009లో లాంఛనంగా ప్రారంభించారు.

ఇదే సమయంలో భారత సైనిక దళాల ప్రధానాధికారి జనరల్ ధీరజ్ సేథ్ కూడా అధికారిక పర్యటన కోసం రష్యాలో ఉన్నారు. మాస్కోలో గౌరవ వందనం స్వీకరించి, రష్యా భూ బలగాల ప్రధాన కార్యాలయాన్ని సందర్శించి, సైనిక సహకారం, శిక్షణ మార్పిడులు, సామర్థ్యాభివృద్ధి వంటి అంశాలపై చర్చలు జరిపారు. భారత్, రష్యా రక్షణ బంధం బహుముఖంగా బలపడుతున్నట్లు ఈ పర్యటనలు సూచిస్తున్నాయి.