రూ.3.14 కోట్లతో నిర్మించిన రహదారి ప్రారంభం విట్లంపల్లి ప్రజలకు రోడ్డును అంకితం చేసిన ఎమ్మెల్యే అమిలినేని సురేంద్రబాబు

అనంతపురం బ్యూరో : ఎన్నో ఏళ్లుగా గుంతలమయమై ప్రజలకు ఇబ్బందులు కలిగిస్తున్న రహదారికి ఎట్టకేలకు మోక్షం లభించింది. కళ్యాణదుర్గం ఎమ్మెల్యే అమిలినేని సురేంద్రబాబు ప్రత్యేక చొరవతో రూ.3.14 కోట్ల వ్యయంతో నూతనంగా నిర్మించిన రహదారిని ఆయన ప్రారంభించి ప్రజలకు అంకితం చేశారు.

అనంతపురం జిల్లా కళ్యాణదుర్గం మండలంలో కళ్యాణదుర్గం నుంచి రాయదుర్గం వెళ్లే ప్రధాన రహదారి మీదుగా మల్లికార్జునపల్లి, విట్లంపల్లి, హులికల్లు గ్రామాలకు వెళ్లే మార్గంలో ఈ రహదారిని నిర్మించారు. గతంలో రహదారి గుంతలమయంగా ఉండటంతో ప్రజలు రాకపోకలకు తీవ్ర ఇబ్బందులు ఎదుర్కొనేవారు. ఎమ్మెల్యే ప్రత్యేక చొరవతో నిధులు మంజూరు కావడంతో రహదారి నిర్మాణం పూర్తయింది.

ప్రారంభోత్సవం సందర్భంగా విట్లంపల్లి గ్రామానికి విచ్చేసిన ఎమ్మెల్యే అమిలినేని సురేంద్రబాబుకు గ్రామస్థులు, టీడీపీ నాయకులు ఘన స్వాగతం పలికారు. పూలవర్షం కురిపిస్తూ గజమాలతో సత్కరించారు. అనంతరం ఎమ్మెల్యే చేతుల మీదుగా ప్రారంభోత్సవ కేక్‌ను కట్ చేసి సంబరాలు జరుపుకున్నారు.

ఈ కార్యక్రమంలో టీడీపీ సీనియర్ నాయకులు, గ్రామస్థులు, పార్టీ శ్రేణులు పాల్గొన్నారు. రహదారి నిర్మాణం పూర్తవడంతో ఆయా గ్రామాల ప్రజలకు ప్రయాణ సౌకర్యం మెరుగుపడనుందని స్థానికులు హర్షం వ్యక్తం చేశారు.