మహారాష్ట్రలో ఘోర రోడ్డు ప్రమాదం: దేవీ విగ్రహంతో వెళ్తుండగా బొలెరోను ఢీకొట్టిన ట్రక్కు.. ఏడుగురు మృతి, 19 మందికి గాయాలు

ముంబై: దేవీ నవరాత్రి ఉత్సవాల వేళ మహారాష్ట్రలో తీవ్ర విషాదం చోటుచేసుకుంది. అమరావతి జిల్లా ధమన్‌గావ్ సమీపంలోని సమృద్ధి మహామార్గ్‌పై వేగంగా వచ్చిన ఒక ట్రక్కు, బొలెరో వాహనాన్ని బలంగా ఢీకొట్టడంతో ఏడుగురు అక్కడికక్కడే ప్రాణాలు కోల్పోగా, మరో 19 మంది తీవ్రంగా గాయపడ్డారు.

షెగావ్ నుంచి దుర్గాదేవి విగ్రహాన్ని తమ ఊరికి తీసుకెళ్తుండగా ఈ భయానక ప్రమాదం జరిగింది. సమాచారం అందుకున్న పోలీసులు వెంటనే ఘటనా స్థలానికి చేరుకుని స్థానికుల సహాయంతో సహాయక చర్యలు చేపట్టారు. క్షతగాత్రులను చికిత్స నిమిత్తం సమీప ఆసుపత్రికి తరలించారు. పండుగ వాతావరణం నెలకొనాల్సిన సమయంలో ఈ విషాదం జరగడంతో ఆయా గ్రామాల్లో తీవ్ర శోకసంద్రం అలుముకుంది. పోలీసులు కేసు నమోదు చేసి దర్యాప్తు చేస్తున్నారు.