లక్నో వెళ్లే ఇండిగో విమానానికి హైజాక్ బెదిరింపు: బెంగళూరుకు వాపస్

సూర్య నేషనల్ డెస్క్: కర్ణాటక రాజధాని బెంగళూరు నుంచి ఉత్తరప్రదేశ్‌లోని లక్నో బయలుదేరిన ఇండిగో విమానంలో హైజాక్ బెదిరింపు లేఖ కలకలం సృష్టించింది. గాల్లో ప్రయాణిస్తున్న సమయంలో విమానంలోనే బెదిరింపు నోట్ కనిపించడంతో విమాన సిబ్బంది, ప్రయాణికులు తీవ్ర భయాందోళనలకు గురయ్యారు. పరిస్థితి తీవ్రతను గుర్తించిన పైలట్లు వెంటనే ఎయిర్ ట్రాఫిక్ కంట్రోల్ (ఏటీసీ) అధికారులను అప్రమత్తం చేసి, విమానాన్ని తిరిగి బెంగళూరులోని కెంపేగౌడ అంతర్జాతీయ విమానాశ్రయానికి మళ్లించారు.

విమానం సురక్షితంగా బెంగళూరులో అత్యవసర ల్యాండింగ్ అయిన వెంటనే భద్రతా యంత్రాంగం రంగంలోకి దిగింది. సెంట్రల్ ఇండస్ట్రియల్ సెక్యూరిటీ ఫోర్స్ (సీఐఎస్ఎఫ్), బాంబ్ డిస్పోజల్ స్క్వాడ్ మరియు విమానాశ్రయ భద్రతా బృందాలు విమానాన్ని ఐసోలేషన్ బేకి తరలించి అణువణువూ గాలించాయి. ప్రయాణికులందరినీ సురక్షితంగా కిందికి దించి, వారి లగేజీతో పాటు విమాన క్యాబిన్, కార్గో విభాగాలను క్షుణ్ణంగా తనిఖీ చేశారు.

ఈ బెదిరింపు లేఖ ఎక్కడి నుంచి వచ్చింది? విమానంలోకి దాన్ని ఎవరు తీసుకొచ్చారు? ప్రయాణికుల్లో ఎవరైనా ఆకతాయి చర్యగా చేశారా లేక ఉద్దేశపూర్వక కుట్ర ఉందా అనే కోణంలో భద్రతా సంస్థలు మరియు పోలీసులు దర్యాప్తు ప్రారంభించారు. ప్రయాణికుల జాబితా, బోర్డింగ్ పాస్‌లను పరిశీలిస్తూ అనుమానితులను ప్రశ్నిస్తున్నారు. భద్రతా తనిఖీలు పూర్తయి అంతా క్లియర్ అయిన తర్వాతే విమాన సర్వీసులను పునరుద్ధరిస్తామని ఎయిర్‌లైన్స్ మరియు విమానాశ్రయ అధికారులు స్పష్టం చేశారు.