బస్తర్ జవాన్లతో ప్రధాని మోదీ దీపావళి: నక్సలిజం రహిత తొలి పండుగ
సూర్య నేషనల్ డెస్క్: దశాబ్దాల పాటు మావోయిస్టు ప్రాబల్యంతో అట్టుడికిన ఛత్తీస్‌గఢ్‌లోని బస్తర్ ప్రాంతంలో ప్రధానమంత్రి నరేంద్ర మోదీ భద్రతా బలగాల నడుమ ఘనంగా దీపావళి వేడుకలను జరుపుకున్నారు. దేశంలో నక్సలిజం కోరల నుంచి విముక్తి లభించిన తర్వాత జరుపుకుంటున్న మొట్టమొదటి దీపావళి పండుగ ఇదేనని ఆయన సగర్వంగా ప్రకటించారు. దేశంలోని ప్రతి జిల్లా ఇప్పుడు నక్సల్స్ ముప్పు నుంచి విముక్తి పొందిందని, కోట్ల మంది దేశ ప్రజలు వామపక్ష తీవ్రవాద భయం నుంచి బయటపడి శాంతియుత వాతావరణంలో జీవిస్తున్నారని ప్రధాని స్పష్టం చేశారు.
ఈ సందర్భంగా సరిహద్దులు, అంతర్గత భద్రతా విధుల్లో అహర్నిశలు శ్రమిస్తున్న సీఆర్‌పీఎఫ్, కోబ్రా , బీఎస్ఎఫ్, ఐటీబీపీ, ఎస్‌ఎస్‌బీ మరియు స్థానిక 'బస్తర్ ఫైటర్స్' దళాల వీరత్వాన్ని మోదీ కొనియాడారు. "మీరంతా నా కుటుంబంలో ఒక భాగం.. అందుకే ఈసారి మీతో కలిసి దీపావళి జరుపుకోవడానికి బస్తర్ అడవులకు వచ్చాను. ఒకప్పుడు నక్సలిజం ఛాయలు కమ్ముకున్న ఈ నేల, మీ అసమాన త్యాగాలు, అంకితభావం వల్లే నేడు శాంతియుత అభివృద్ధి బాట పట్టింది" అని ప్రధాని ప్రశంసించారు. దేశ అంతర్గత భద్రత పటిష్టంగా ఉన్నప్పుడే విదేశీ శక్తుల కుట్రలు కూడా ఫలించవని ఆయన పేర్కొన్నారు.
హింసను వీడి జనజీవన స్రవంతిలోకి వచ్చేవారికి పునరావాసం కల్పిస్తూనే, దేశ సార్వభౌమాధికారాన్ని సవాలు చేసే శక్తులపై భద్రతా బలగాలు కఠినంగా వ్యవహరిస్తాయని ప్రధాని హెచ్చరించారు. నక్సలిజం అంతమొందడంతో బస్తర్ సహా గతంలో ప్రభావితమైన మారుమూల ప్రాంతాల్లో విద్య, వైద్యం, రోడ్లు, విద్యుత్, టూరిజం వంటి మౌలిక సదుపాయాలు సరికొత్త వేగం పుంజుకున్నాయని తెలిపారు. జవాన్లకు స్వయంగా మిఠాయిలు తినిపించి శుభాకాంక్షలు తెలిపిన ప్రధాని, దేశ సమగ్రత కోసం ప్రాణాలర్పించిన అమరవీరులకు నివాళులర్పించారు.
