యూకేలో ఉగ్రవాద కుట్ర కలకలం
సూర్య అంతర్జాతీయ డెస్క్: బ్రిటన్‌లో యూదుల సమాజాన్ని లక్ష్యంగా చేసుకుని భారీ ఉగ్రవాద దాడికి కుట్ర పన్నిన ఘటన తీవ్ర కలకలం రేపింది. ఇంగ్లాండ్‌లోని మాంచెస్టర్ నగరంలో యూదుల ప్రార్థనా మందిరాలు మరియు ఇతర ముఖ్యమైన ప్రాంతాలపై బాంబు దాడికి ప్రణాళిక వేసిన ఇద్దరు ఇరానియన్ జాతీయులను పోలీసులు గతంలో అరెస్ట్ చేయగా, తాజాగా వారిని కోర్టులో హాజరుపరిచారు. ఈ దాడులకు సంబంధించి కౌంటర్ టెర్రరిజం పోలీసులు మరియు భద్రతా బలగాలు సంయుక్తంగా దర్యాప్తును ముమ్మరం చేశాయి. విదేశీ గడ్డపై ఉగ్రవాద కార్యకలాపాలకు పాల్పడేందుకు జరిగిన ఈ కుట్ర యూకే వ్యాప్తంగా తీవ్ర సంచలనం సృష్టించింది.
అధికారులు వెల్లడించిన వివరాల ప్రకారం, నిందితులు రహస్యంగా ఎన్‌క్రిప్టెడ్ యాప్‌ల ద్వారా విదేశాలలో ఉన్న వ్యక్తులతో సంప్రదింపులు జరిపి స్వదేశంలోనే పేలుడు పదార్థాలను తయారు చేసే విధానాలపై సమాచారం సేకరించారు. మాంచెస్టర్‌‌లోని ప్రముఖ యూదుల కేంద్రాలు మరియు మ్యూజియంలపై నిఘా పెట్టి, శత్రుపూరిత రీతిలో రెక్కీ నిర్వహించినట్లు ప్రాథమిక విచారణలో వెల్లడైంది. యూదుల పవిత్ర దినమైన 'యోమ్ కిప్పూర్' పర్వదినానికి కొద్ది గంటల ముందు భద్రతా దళాలు వీరిని అదుపులోకి తీసుకోవడంతో ఒక పెద్ద పెను ప్రమాదం తప్పింది. ఈ ఘటనపై వెస్ట్ మినిస్టర్ మేజిస్ట్రేట్ కోర్టులో విచారణ జరగగా, నిందితులను రిమాండ్‌కు తరలించి తదుపరి విచారణను లండన్‌లోని ఓల్డ్ బెయిలీ కోర్టుకు వాయిదా వేశారు.
నిందితులు గతంలో అక్రమ మార్గాల్లో చిన్న నౌకల ద్వారా ఫ్రాన్స్ నుంచి సరిహద్దులు దాటి యూకేలోకి ప్రవేశించినట్లు ప్రాథమిక విచారణలో తేలింది. యూకేలో శరణార్థులుగా ఆశ్రయం పొందుతూనే దేశ భద్రతకు ముప్పు కలిగించేలా ఉగ్రవాద కుట్రలకు పాల్పడటంపై స్థానిక ప్రజలు మరియు రాజకీయ వర్గాల నుంచి తీవ్ర నిరసన వ్యక్తమవుతోంది. బ్రిటన్‌లో గత కొంతకాలంగా యూదులు మరియు ఇజ్రాయెల్ సంస్థలను లక్ష్యంగా చేసుకుని దాడులు పెరుగుతున్న నేపథ్యంలో, ఇంటెలిజెన్స్ వర్గాలు నిఘాను మరింత కఠినతరం చేశాయి. ఈ కుట్ర వెనుక మరింత మంది అంతర్జాతీయ వ్యక్తుల ప్రమేయం ఉందనే కోణంలో భద్రతా బలగాలు సమగ్ర దర్యాప్తు కొనసాగిస్తున్నాయి.
