రాష్ట్రస్థాయి కబడ్డీ పోటీలకు పకడ్బందీ ఏర్పాట్లు

*రాష్ట్రస్థాయి కబడ్డీ పోటీలకు పకడ్బందీ ఏర్పాట్లు*

*ఏర్పాట్లపై ఎమ్మెల్యే జారె ఆదినారాయణ సమీక్ష*

*క్రీడా కమిటీలు, అధికారులతో సమావేశం.. విజయవంతంగా నిర్వహించేందుకు సమన్వయంతో ముందుకు వెళ్లాలని సూచన*

*అశ్వారావుపేట టౌన్ (సూర్య మేజర్ న్యూస్)*

భద్రాద్రి కొత్తగూడెం జిల్లా అశ్వారావుపేట మున్సిపాలిటీ పరిధిలో ఈ నెల 10, 11, 12 తేదీల్లో నిర్వహించనున్న రాష్ట్రస్థాయి కబడ్డీ పోటీలను విజయవంతంగా నిర్వహించేందుకు పకడ్బందీ ఏర్పాట్లు చేయాలని అశ్వారావుపేట ఎమ్మెల్యే జారె ఆదినారాయణ సూచించారు. రాష్ట్రస్థాయి క్రీడాకారులు, క్రీడా నిర్వాహకులు, ప్రేక్షకులు పెద్ద సంఖ్యలో తరలివచ్చే అవకాశం ఉన్న నేపథ్యంలో ఎలాంటి ఇబ్బందులు తలెత్తకుండా ముందస్తు చర్యలు చేపట్టాలని అధికారులను ఆదేశించారు.

రాష్ట్రస్థాయి కబడ్డీ పోటీల ఏర్పాట్లపై శనివారం అశ్వారావుపేట ఎమ్మెల్యే క్యాంపు కార్యాలయంలో ఎమ్మెల్యే జారె ఆదినారాయణ ఆధ్వర్యంలో మండల అధికారులు, క్రీడా కమిటీ ప్రతినిధులు, నిర్వాహకులు, ప్రజాప్రతినిధులతో సమీక్ష సమావేశం నిర్వహించారు. ఈ సందర్భంగా పోటీల నిర్వహణకు సంబంధించిన వివిధ అంశాలపై సుదీర్ఘంగా చర్చించారు.

క్రీడా పోటీల నిర్వహణ ప్రాంగణం, క్రీడాకారులకు అవసరమైన సౌకర్యాలు, తాగునీరు, విద్యుత్, పారిశుద్ధ్యం, భద్రత, వైద్య సదుపాయాలు, పార్కింగ్ తదితర అంశాలపై ఎమ్మెల్యే అధికారులను అడిగి తెలుసుకున్నారు. రాష్ట్రంలోని వివిధ ప్రాంతాల నుంచి క్రీడాకారులు అశ్వారావుపేటకు రానున్నందున వారికి ఎలాంటి అసౌకర్యం కలగకుండా అన్ని ఏర్పాట్లు పూర్తి చేయాలని సూచించారు.

కబడ్డీ పోటీలు కేవలం క్రీడా కార్యక్రమంగా కాకుండా అశ్వారావుపేట ప్రాంతానికి రాష్ట్రస్థాయిలో గుర్తింపు తీసుకువచ్చే కార్యక్రమంగా నిలిచేలా అందరూ సమన్వయంతో పనిచేయాలని ఎమ్మెల్యే జారె ఆదినారాయణ పేర్కొన్నారు. క్రీడాకారుల్లో ప్రతిభను వెలికితీయడానికి ఇటువంటి పోటీలు ఎంతగానో ఉపయోగపడతాయని అన్నారు.

క్రీడలకు ప్రభుత్వం ప్రాధాన్యత

యువతలో క్రీడా స్ఫూర్తిని పెంపొందించడంతో పాటు శారీరక, మానసిక ఆరోగ్యాన్ని మెరుగుపరచడంలో క్రీడలు కీలక పాత్ర పోషిస్తాయని ఎమ్మెల్యే తెలిపారు. గ్రామీణ, పట్టణ ప్రాంతాల్లో ప్రతిభ ఉన్న క్రీడాకారులను ప్రోత్సహించేందుకు అవసరమైన సహకారం అందించాల్సిన బాధ్యత అందరిపైనా ఉందన్నారు.

అశ్వారావుపేటలో రాష్ట్రస్థాయి కబడ్డీ పోటీలు నిర్వహించడం పట్ల క్రీడాభిమానులు, యువతలో ఉత్సాహం నెలకొంది. పోటీలకు వచ్చే క్రీడాకారులకు ఆతిథ్యం, సౌకర్యాల కల్పనలో ఎలాంటి లోటుపాట్లు లేకుండా నిర్వాహకులు, అధికారులు సమన్వయంతో పనిచేయాలని ఎమ్మెల్యే సూచించారు.

పోటీల సందర్భంగా ప్రేక్షకులకు కూడా ఎలాంటి ఇబ్బందులు లేకుండా తగిన ఏర్పాట్లు చేయాలని, ట్రాఫిక్ నియంత్రణకు అవసరమైన చర్యలు చేపట్టాలని సూచించారు. అత్యవసర పరిస్థితులను దృష్టిలో ఉంచుకుని వైద్య సిబ్బంది, ప్రథమ చికిత్స సదుపాయాలు అందుబాటులో ఉంచాలని తెలిపారు.

భారీగా పాల్గొననున్న క్రీడాకారులు

ఈ నెల 10, 11, 12 తేదీల్లో జరగనున్న రాష్ట్రస్థాయి కబడ్డీ పోటీల్లో వివిధ ప్రాంతాల నుంచి ప్రతిభావంతులైన క్రీడాకారులు పాల్గొననున్నారు. మూడు రోజుల పాటు జరిగే ఈ పోటీలు ఉత్కంఠభరితంగా సాగనున్నాయి. క్రీడాకారులకు అవసరమైన మౌలిక వసతుల కల్పనతో పాటు పోటీలను నిబంధనలకు అనుగుణంగా నిర్వహించేలా క్రీడా కమిటీలు చర్యలు చేపడుతున్నాయి.

సమీక్ష సమావేశంలో అశ్వారావుపేట మండల అధ్యక్షుడు చిన్నంశెట్టి సత్యనారాయణ, మున్సిపల్ వైస్ చైర్మన్ జూపల్లి రమేష్ బాబు, జిల్లా జనరల్ సెక్రెటరీ కోలా లక్ష్మీనారాయణ, తుమ్మా రాంబాబు, మున్సిపల్ కౌన్సిలర్లు కట్ట సింధుజ, దండబత్తుల ఆదిలక్ష్మి, కారం కనకదుర్గ, ఆట్టం రమ్య, మిండా హరిబాబు, నార్లపాటి మహేష్, నార్లపాటి దివాకర్, తిరుమల శెట్టి వెంకన్న బాబు, మోర్ల రాజేశ్వరి, కొట్టే నాగ సునీత, ఎస్.కె  రెహనా, ఎస్.కె నూర్జహాన్, మైనార్టీ మండల అధ్యక్షుడు  కరీం మండల అధికారులు, క్రీడా కమిటీ సభ్యులు, నిర్వాహకులు తదితరులు పాల్గొన్నారు.

సూర్య ప్రతినిధి మునీర్ అశ్వారావుపేట