స్థానిక ఎన్నికలకు వైఎస్సార్‌సీపీ సన్నద్ధం పెనుగంచిప్రోలులో పార్టీ శ్రేణులకు సభ్యత్వ కార్డుల పంపిణీ
స్థానిక ఎన్నికలకు వైఎస్సార్‌సీపీ సన్నద్ధం
పెనుగంచిప్రోలులో పార్టీ శ్రేణులకు సభ్యత్వ కార్డుల పంపిణీ
పెనుగంచిప్రోలు మేజర్ న్యూస్ ప్రతినిధి (ప్రశాంత్ )అక్టోబర్ 4: స్థానిక సంస్థల ఎన్నికలకు వైఎస్సార్ కాంగ్రెస్ పార్టీ శ్రేణులు సిద్ధం కావాలని జగ్గయ్యపేట నియోజకవర్గ వైఎస్సార్‌సీపీ ఇన్‌ఛార్జ్ తన్నీరు నాగేశ్వరరావు పిలుపునిచ్చారు. పెనుగంచిప్రోలు గ్రామంలోని తంబరేణి ఫంక్షన్ హాల్‌లో గ్రామ వైఎస్సార్‌సీపీ ఆధ్వర్యంలో నిర్వహించిన ఎన్నికల సన్నాహక సమావేశంలో ఆయన పాల్గొన్నారు. ఈ సందర్భంగా పార్టీ శ్రేణులకు సభ్యత్వ కార్డులను అందజేశారు. గ్రామంలోని వివిధ అనుబంధ విభాగాలకు చెందిన పార్టీ సభ్యులకు కూడా సభ్యత్వ కార్డులను పంపిణీ చేశారు. రాబోయే స్థానిక సంస్థల ఎన్నికల్లో వైఎస్సార్‌సీపీ విజయానికి ప్రతి నాయకుడు, కార్యకర్త అహర్నిశలు కష్టపడి పనిచేయాలని తన్నీరు నాగేశ్వరరావు సూచించారు. గ్రామస్థాయిలో పార్టీని మరింత బలోపేతం చేయడంతో పాటు ప్రజల సమస్యలను ఎప్పటికప్పుడు తెలుసుకుని, వారి తరఫున పోరాడాలని కోరారు. కూటమి ప్రభుత్వ ప్రజావ్యతిరేక విధానాలను ప్రజల్లోకి విస్తృతంగా తీసుకెళ్లాలని పార్టీ శ్రేణులకు పిలుపునిచ్చారు. కూటమి పాలనపై ప్రజల్లో వ్యతిరేకత ప్రారంభమైందని పేర్కొంటూ, రాబోయే రోజుల్లో వైఎస్సార్‌సీపీ మరింత బలమైన రాజకీయ శక్తిగా ఎదుగుతుందని కార్యకర్తలకు భరోసా ఇచ్చారు. కార్యక్రమంలో గ్రామ వైఎస్సార్‌సీపీ వివిధ హోదాల్లో ఉన్న నాయకులు, కార్యకర్తలు, మహిళలు పెద్ద సంఖ్యలో పాల్గొన్నారు.
