బీసీల హక్కుల కోసం కాంగ్రెస్ ప్రభుత్వం చిత్తశుద్ధితో పనిచేస్తోంది...

శంషాబాద్‌లో టీపీసీసీ ఓబీసీ సెల్ ఆధ్వర్యంలో భారీ బహిరంగ సభ లో పాల్గొన్న బీర్ల అయిలయ్య

యాదగిరిగుట్ట మేజర్ న్యూస్...

సామాజిక న్యాయం బీసీల రాజ్యాంగ హక్కు అని, దేశవ్యాప్తంగా నిర్వహించే జనగణనలో ఓబీసీ కులాల గణనను కూడా చేపట్టి బీసీలకు జనాభా ప్రాతిపదికన న్యాయం చేయాలని డిమాండ్ చేస్తూ శంషాబాద్ గొల్లపల్లి ఎక్స్ రోడ్డు వద్ద టీపీసీసీ ఓబీసీ సెల్ ఆధ్వర్యంలో భారీ బహిరంగ సభ నిర్వహించారు.
టీపీసీసీ ఓబీసీ సెల్ చైర్మన్, ఎమ్మెల్యే శంకరయ్య అధ్యక్షతన జరిగిన ఈ సభకు టీపీసీసీ అధ్యక్షులు మహేష్ కుమార్ గౌడ్, మంత్రి పొన్నం ప్రభాకర్, తెలంగాణ రాష్ట్ర ప్రభుత్వ విప్, ఆలేరు ఎమ్మెల్యే బీర్ల అయిలయ్య ముఖ్య అతిథులుగా హాజరయ్యారు. రాష్ట్రంలోని వివిధ ప్రాంతాల నుంచి పెద్ద సంఖ్యలో బీసీ నాయకులు, కార్యకర్తలు, ప్రజలు సభకు తరలివచ్చారు.
ఈ సందర్భంగా తెలంగాణ రాష్ట్ర ప్రభుత్వ విప్, ఆలేరు ఎమ్మెల్యే బీర్ల అయిలయ్య మాట్లాడుతూ దేశ జనాభాలో బీసీలు అత్యధిక సంఖ్యలో ఉన్నప్పటికీ విద్య, ఉద్యోగాలు, రాజకీయాలు, ఆర్థిక రంగాల్లో వారికి రావాల్సిన స్థాయిలో అవకాశాలు దక్కడం లేదన్నారు. బీసీల సామాజిక, ఆర్థిక, రాజకీయ పరిస్థితులను శాస్త్రీయంగా అంచనా వేయాలంటే కులగణన ఎంతో అవసరమని పేర్కొన్నారు. బీసీల జనాభా ఎంత ఉందో లెక్కలు తేలితేనే వారికి దక్కాల్సిన హక్కులు, అవకాశాలు, నిధులు, ప్రాతినిధ్యం ఎంత ఉండాలో స్పష్టమవుతుందని అన్నారు. కులగణన ద్వారా బీసీల వాస్తవ పరిస్థితులను గుర్తించి, వారి అభివృద్ధికి అవసరమైన విధానాలను రూపొందించేందుకు ప్రభుత్వాలకు అవకాశం కలుగుతుందని తెలిపారు.
కాంగ్రెస్ పార్టీ ఎప్పటి నుంచో సామాజిక న్యాయం కోసం పోరాడుతోందని, బీసీలకు రాజ్యాంగబద్ధమైన హక్కులు, సమాన అవకాశాలు కల్పించాలనే లక్ష్యంతో ముందుకు సాగుతోందని బీర్ల అయిలయ్య గారు అన్నారు. తెలంగాణలో బీసీల సంక్షేమం, అభివృద్ధి కోసం కాంగ్రెస్ ప్రభుత్వం అనేక కీలక నిర్ణయాలు తీసుకుంటోందని తెలిపారు. బీసీలకు విద్య, ఉద్యోగాలు, ఉపాధి, రాజకీయ ప్రాతినిధ్యం పెరగడంతో పాటు ఆర్థికంగా బలోపేతం చేయడమే కాంగ్రెస్ ప్రభుత్వ లక్ష్యమని అన్నారు. బీసీ యువతకు నైపుణ్యాభివృద్ధి, స్వయం ఉపాధి, విద్యా అవకాశాలు పెంచేందుకు మరిన్ని చర్యలు తీసుకోవాల్సిన అవసరం ఉందన్నారు.
బీసీల సమస్యలను కేవలం ఎన్నికల సమయంలో మాట్లాడే అంశంగా కాకుండా, వారి భవిష్యత్తుతో ముడిపడిన సామాజిక న్యాయ అంశంగా చూడాలని ఆయన అన్నారు. జనాభా ప్రాతిపదికన హక్కులు, అవకాశాలు, నిధులు, ప్రాతినిధ్యం కల్పించాలన్నదే బీసీల న్యాయమైన డిమాండ్ అని స్పష్టం చేశారు.
తెలంగాణలో బీసీల హక్కుల కోసం టీపీసీసీ ఓబీసీ సెల్ చేస్తున్న పోరాటానికి కాంగ్రెస్ పార్టీ పూర్తి అండగా ఉంటుందని, బీసీ సమాజం ఐక్యంగా ముందుకు సాగి తమ హక్కులను సాధించుకోవాలని బీర్ల అయిలయ్య పిలుపునిచ్చారు.సామాజిక న్యాయం కోసం జరిగే ప్రతి ఉద్యమంలో కాంగ్రెస్ పార్టీ ముందుంటుందని, బీసీలకు న్యాయం జరిగే వరకు పోరాటం కొనసాగుతుందని ఆయన స్పష్టం చేశారు. ఈ సభలో కాంగ్రెస్ పార్టీ నాయకులు, టీపీసీసీ ఓబీసీ సెల్ రాష్ట్ర, జిల్లా నాయకులు, ప్రజాప్రతినిధులు, బీసీ సంఘాల ప్రతినిధులు, కార్యకర్తలు, పెద్ద సంఖ్యలో బీసీ సామాజికవర్గ ప్రజలు పాల్గొన్నారు.