నకిలీ పత్రాలతో భూకబ్జాయత్నం

సూర్య ఆదిలాబాద్ ప్రతినిధి:పట్టణంలోని భుక్తాపూర్ ప్రాంతంలో భూమిని అక్రమంగా కబ్జా చేసేందుకు నకిలీ పత్రాలు సృష్టించి మోసానికి పాల్పడ్డారనే ఫిర్యాదుపై ఆదిలాబాద్ 1 టౌన్ పోలీస్ స్టేషన్లో కేసు నమోదు చేసి దర్యాప్తు చేపట్టడం జరిగిందని వన్టౌన్ సీఐ బి సునీల్ కుమార్ తెలిపారు.
ఫిర్యాదుదారు లక్ష్మణ్ సాంఖ్లా తెలిపిన వివరాల ప్రకారం.. భుక్తాపూర్ ప్రాంతంలో సర్వే నంబర్ 119లో 50 చదరపు గజాల ఖాళీ స్థలం తనకు వారసత్వంగా వచ్చిందని, 2012లో రిజిస్టర్ అయిన పార్టిషన్ డీడ్ ద్వారా తనకు హక్కులు లభించాయని, అప్పటి నుంచి ఆ స్థలాన్ని తన ఆధీనంలో ఉంచుకుని వినియోగిస్తున్నట్లు తెలిపారు.
తన భూమిని ఆక్రమించే ఉద్దేశంతో అజర్ అహ్మద్ ఖాన్, సయ్యద్ హబీబ్, సయ్యద్ నజీర్ పరస్పరం కుమ్మక్కై, తన భూమికి సంబంధం లేని పత్రాలను సృష్టించి తమకు హక్కులు ఉన్నట్లు చూపించే ప్రయత్నం చేశారని ఫిర్యాదులో పేర్కొన్నారు.
గిఫ్ట్ సెటిల్‌మెంట్ డీడ్, అగ్రిమెంట్ ఆఫ్ సేల్ కమ్ జనరల్ పవర్ ఆఫ్ అటార్నీ, అనంతరం సేల్ డీడ్ వంటి మూడు పత్రాలను సృష్టించి, వాటి ఆధారంగా తన భూమిని ఆక్రమించి తనను అక్కడి నుంచి ఖాళీ చేయించే ప్రయత్నం చేస్తున్నారని ఫిర్యాదుదారు ఆరోపించారు.ఫిర్యాదులో పేర్కొన్న అంశాల ఆధారంగా ఆదిలాబాద్ 1 టౌన్ పోలీసులు కేసు నమోదు చేసి, సంబంధిత పత్రాలు, భూమి హక్కులు, పత్రాల నిజానిజాలు మరియు ఘటనకు సంబంధించిన ఇతర అంశాలపై దర్యాప్తు చేస్తున్నారు.
ఈ కేసులో పత్రాల పరిశీలనతో పాటు చట్టపరమైన అన్ని అంశాలను పరిశీలించి దర్యాప్తు కొనసాగిస్తున్నట్లు ఆదిలాబాద్ 1 టౌన్ ఇన్‌స్పెక్టర్ బి. సునీల్ కుమార్ తెలిపారు.