ఇది కలలో కూడా ఊహించలేదు: డొరొతీ సినిమాపై హీరోయిన్ కీర్తి సురేష్ ఆసక్తికర వ్యాఖ్యలు
సూర్య ఎంటర్‌టైన్‌మెంట్ డెస్క్: తెలుగు, తమిళ, మలయాళ భాషల్లో తనకంటూ ప్రత్యేక గుర్తింపు తెచ్చుకున్న స్టార్ హీరోయిన్ కీర్తి సురేష్ వరుస ప్రాజెక్ట్‌లతో దూసుకుపోతున్నారు. ఒకవైపు స్టార్ హీరోల చిత్రాల్లో నటిస్తూనే, మరోవైపు లేడీ ఓరియంటెడ్ కథలు మరియు స్పెషల్ సాంగ్స్‌‌తో ప్రేక్షకులను అలరిస్తున్నారు. ఇటీవల నానితో కలిసి ‘ది ప్యారడైజ్’ మూవీలో స్పెషల్ సాంగ్ చేసిన ఈ భామ, తాజాగా కార్తీక్ సుబ్బరాజ్ దర్శకత్వంలో తెరకెక్కిన ‘డోరతి’ చిత్రంతో ప్రేక్షకుల ముందుకు వచ్చారు. తమిళంలో మంచి ఆదరణ పొందిన ఈ చిత్రం తాజాగా తెలుగు ప్రేక్షకుల ముందుకు కూడా వచ్చి విశేషంగా ఆకట్టుకుంటోంది.
ఈ సినిమా విడుదల సందర్భంగా కీర్తి సురేష్ సోషల్ మీడియా వేదికగా తన ఆనందాన్ని, అనుభూతులను అభిమానులతో పంచుకున్నారు. డొరతి సినిమా తన మనసులో ఎప్పటికీ ప్రత్యేకమైన స్థానాన్ని సంపాదించుకుందని ఆమె పేర్కొన్నారు. కార్తీక్ సుబ్బరాజ్ దర్శకత్వంలో నటించాలనే తన చిరకాల కోరిక ఈ చిత్రంతో నెరవేరిందని, ఆయన నమ్మకంతో తనకు ఈ అవకాశం ఇవ్వడం సంతోషంగా ఉందని తెలిపారు. ఈ చిత్రంలో తన పాత్ర సాధారణ కమర్షియల్ చిత్రాలకు భిన్నంగా ఉండటంతో ప్రేక్షకులు కూడా దీనిని విశేషంగా ఆదరిస్తున్నారని ఆమె తెలిపారు.
ఈ చిత్రానికి మరో ప్రధాన ఆకర్షణ అయిన లెజెండరీ సంగీత దర్శకుడు ఇళయరాజా గురించి కీర్తి సురేష్ ప్రత్యేకంగా ప్రస్తావించారు. ఆయన సృష్టించిన మ్యూజికల్ వరల్డ్‌లో తాను భాగం కావడం ఊహించని అనుభవమని, ఇది తాను కలలో కూడా ఊహించలేదని ఆమె పేర్కొన్నారు. ఒకవైపు డొరతి విజయాన్ని ఆస్వాదిస్తున్న ఆమె, త్వరలో విడుదల కానున్న ‘సత్యవాన్ సావిత్రి’ చిత్రంలో లాయర్ పాత్రలో కనిపించనున్నారు. వైవిధ్యమైన కథాంశాలను ఎంచుకుంటూ దూసుకెళ్తున్న కీర్తి సురేష్ కెరీర్ ప్రస్తుతం టాలీవుడ్ వర్గాల్లో చర్చనీయాంశంగా మారింది.
