వైట్‌హౌస్ వెలుపల కలకలం...వేర్వేరు ఘటనల్లో ఇద్దరిని అరెస్టు చేసిన సీక్రెట్ సర్వీస్
సూర్య అంతర్జాతీయ డెస్క్: అమెరికా అధ్యక్ష భవనం వైట్‌హౌస్ సమీపంలో సోమవారం ఉదయం జరిగిన రెండు వేర్వేరు భద్రతా ఉల్లంఘనల ఘటనలు కలకలం రేపాయి. వైట్‌హౌస్‌కు ఎదురుగా ఉండే లఫాయెట్ పార్క్ (Lafayette Park) ప్రాంతంలో ఒక వ్యక్తి కారును ఫుట్‌పాత్ పైకి దూకించగా, మరొక వ్యక్తి భద్రతా బారికేడ్లను దాటేందుకు ప్రయత్నించాడు. ఈ రెండు వేర్వేరు ఘటనల్లోనూ అప్రమత్తమైన అమెరికా సీక్రెట్ సర్వీస్ (Secret Service) అధికారులు ఇద్దరు నిందితులను తక్షణమే అదుపులోకి తీసుకున్నారు.
సోమవారం ఉదయం 10 గంటల ప్రాంతంలో ఈ పరిణామాలు చోటుచేసుకున్నాయి. లఫాయెట్ పార్క్ ఉత్తర వైపున గల 16వ వీధి మరియు హెచ్ స్ట్రీట్ ప్రాంతంలో ఓ సిల్వర్ సెడాన్ కారు అకస్మాత్తుగా నడకదారిపైకి దూసుకెళ్లింది. ఈ ఘటనలో కారు ఇంజిన్ నుంచి పొగలు వస్తున్న దృశ్యాలు సోషల్ మీడియాలో వైరల్ అయ్యాయి. కారు నడిపిన డ్రైవర్ భద్రతా సిబ్బందితో వాగ్వాదానికి దిగి ఘర్షణకు ప్రయత్నించగా, సీక్రెట్ సర్వీస్ పోలీసులు మరియు నేషనల్ గార్డ్ సిబ్బంది వెంటనే స్పందించి అతనిని కిందకు పడవేసి అదుపులోకి తీసుకున్నారు.
ఇதே సమయంలో లఫాయెట్ పార్క్ వాయువ్య మూలన ఉన్న భద్రతా బారికేడ్‌ను మరో వ్యక్తి బలవంతంగా దూకేందుకు ప్రయత్నించాడు. అప్రమత్తమైన సెక్యూరిటీ సిబ్బంది క్షణాల వ్యవధిలో ఆ వ్యక్తిని కూడా అరెస్టు చేశారు. ఈ అకస్మాత్ పరిణామాలతో వైట్‌హౌస్ భద్రతా సిబ్బంది అప్రమత్తమై వైట్‌హౌస్ ప్రాంగణంలో ఉన్న మీడియా ప్రతినిధులను కొద్దిసేపు భవనం లోపలికి వెళ్లాలని ఆదేశించారు. అలాగే పార్క్ చుట్టుపక్కల ఉన్న రహదారులను తాత్కాలికంగా మూసివేసి తనిఖీలు చేపట్టారు.
ఈ రెండు ఘటనలకు పరస్పర సంబంధం ఉందా లేదా అనే కోణంలో సీక్రెట్ సర్వీస్ అధికారులు దర్యాప్తు ముమ్మరం చేశారు. కారుని పేలుడు పదార్థాల కోసంచ డి.సి. పోలీసులు తనిఖీ చేశారు. వైట్‌హౌస్ కాంప్లెక్స్ సమీపంలో భద్రతా వలయాన్ని ఛేదించేందుకు జరుగుతున్న ఇలాంటి ప్రయత్నాలను తీవ్రంగా పరిగణిస్తున్నామని, ప్రెసిడెంట్ భద్రతకు ఎటువంటి ముప్పు వాటిల్లలేదని అధికారులు స్పష్టం చేశారు.
