గగనతలంలో అసాధారణ సాహసం:

 భారత పైలట్ కెప్టెన్ స్మిత్ మచ్చార్‌ను సత్కరించేందుకు యూఎస్ కాంగ్రెస్‌లో తీర్మానం!
సూర్య అంతర్జాతీయ డెస్క్: గగనతలంలో విమానాన్ని కూల్చేందుకు జరిగిన భయానక ఉగ్ర కుట్రను అత్యంత సాహసోపేతంగా అడ్డుకుని వందలాది మంది ప్రయాణికుల ప్రాణాలను కాపాడిన భారత పైలట్ కెప్టెన్ స్మిత్ మచ్చార్ (Smit Machchhar) ధైర్యసాహసాలను అమెరికా కాంగ్రెస్ అధికారికంగా గౌరవించనుంది. దుబాయ్ నుంచి ఇజ్రాయెల్‌లోని టెల్ అవీవ్‌కు వెళ్తున్న ఫ్లైదుబాయ్ (Flydubai) విమానంలో ఆయన ప్రదర్శించిన వీరోచిత ప్రతిఘటనను కొనియాడుతూ యూఎస్ ప్రతినిధుల సభలో (US House of Representatives) ద్వైపాక్షిక తీర్మానాన్ని (H. Res. 1612) ప్రవేశపెట్టారు.

న్యూజెర్సీకి చెందిన కాంగ్రెస్ సభ్యుడు జోష్ గోథైమర్ ఈ తీర్మానాన్ని ప్రవేశపెట్టగా, రిపబ్లికన్ నేతలు మైఖేల్ మెక్‌కాల్, డాన్ బేకన్‌లు దీనికి సహ-ప్రాయోజకులుగా నిలిచారు. విమానం కాక్‌పిట్‌లోకి దూసుకొచ్చిన సహ-పైలట్ దాడిని ఒంటిచేత్తో ప్రతిఘటిస్తూ, తీవ్ర గాయాల పాలైనప్పటికీ నియంత్రణ కోల్పోకుండా క్యాబిన్ సిబ్బంది, తోటి ప్రయాణికుల సహకారంతో విమానాన్ని సురక్షితంగా ల్యాండ్ చేయడంలో స్మిత్ చూపిన ‘అసాధారణ ధైర్యం’ అనిర్వచనీయమని తీర్మానంలో కొనియాడారు.

విమానాన్ని రక్షించి పెను ప్రాణనష్టాన్ని నివారించిన కెప్టెన్ స్మిత్ మచ్చార్‌కు ప్రపంచవ్యాప్తంగా ప్రశంసలు వెల్లువెత్తుతున్నాయి. అగ్రరాజ్యం అమెరికా అత్యున్నత చట్టసభ వేదికగా ఒక భారతీయ పైలట్‌ను గుర్తించి ప్రత్యేక తీర్మానం చేయడం అంతర్జాతీయ స్థాయిలో భారత ప్రతిభకు, ధైర్యసాహసాలకు దక్కిన అరుదైన గౌరవంగా నిలిచింది.