ఉక్రెయిన్‌కు జర్మనీ భారీ మద్దతు.. డ్రోన్ ఒప్పందం ఖరారు
సూర్య అంతర్జాతీయ డెస్క్: రష్యా భీకర దాడులతో అట్టుడుకుతున్న ఉక్రెయిన్‌కు అండగా నిలిచేందుకు జర్మనీ అడుగు ముందుకు వేసింది. జర్మనీ ఛాన్సలర్ ఫ్రెడరిక్ మెర్జ్ ఆదివారం ఆకస్మికంగా ఉక్రెయిన్ రాజధాని కీవ్‌లో పర్యటించారు. రష్యా దాడుల నేపథ్యంలో ఉక్రెయిన్‌కు సంపూర్ణ మద్దతు ప్రకటించడంతో పాటు, రెండు దేశాల మధ్య కీలకమైన సంయుక్త డ్రోన్ ఉత్పత్తి ఒప్పందాన్ని ఖరారు చేసేందుకు ఆయన ఈ పర్యటన చేపట్టారు. ఈ సమావేశంలో ఉక్రెయిన్ అధ్యక్షుడు వొలొదిమిర్ జెలెన్‌స్కీతో భేటీ అయిన మెర్జ్... రష్యా దురాక్రమణను అడ్డుకోవడంలో ఐరోపా దేశాల ఐక్యత ఎంతో కీలకమని నొక్కిచెప్పారు.
ఈ పర్యటనలో భాగంగా ఉక్రెయిన్‌కు భారీ ఆర్థిక మరియు సైనిక సహాయ ప్యాకేజీని ఛాన్సలర్ మెర్జ్ ప్రకటించారు. సుమారు 1 బిలియన్ యూరోల (దాదాపు 1.13 బిలియన్ డాలర్లు) సైనిక సహాయంతో పాటు, రష్యా దాడుల కారణంగా దెబ్బతిన్న ఇంధన రంగాన్ని పునరుద్ధరించడానికి మరో 350 మిలియన్ యూరోలను విడుదల చేయనున్నట్లు జర్మన్ ప్రభుత్వ అధికారులు వెల్లడించారు. శీతాకాలం సమీపిస్తున్న తరుణంలో ఉక్రెయిన్ పవర్ గ్రిడ్స్ మరియు ఇంధన కేంద్రాలపై రష్యా దాడులు ఉధృతమవుతున్న నేపథ్యంలో ఈ నిధులు అత్యంత కీలకం కానున్నాయి. జర్మనీ రక్షణ రంగానికి చెందిన ప్రముఖ కంపెనీల సీఈఓలు కూడా ఈ పర్యటనలో ఛాన్సలర్ వెంట ఉండటం గమనార్హం.
ఈ సందర్భంగా మాట్లాడిన ఫ్రెడరిక్ మెర్జ్... రష్యాను కట్టడి చేయడంలో విఫలమైతే, భవిష్యత్తులో ఆ యుద్ధ యంత్రం తమ వైపునకు కూడా మరులుతుందని హెచ్చరించారు. ఉక్రెయిన్‌కు జర్మనీ అండగా ఉంటుందని, రాబోయే క్లిష్టమైన వారాల్లో ఆ దేశానికి అన్ని విధాలా సహాయ సహకారాలు అందిస్తామని స్పష్టం చేశారు. మరోవైపు జర్మనీ భాగస్వామ్యంతో డ్రోన్లు, క్షిపణులు మరియు సాఫ్ట్‌‌వేర్ తయారీకి సంబంధించిన ఒప్పందాలు త్వరలోనే తుది రూపం దాల్చనున్నాయని ఉక్రెయిన్ అధ్యక్షుడు జెలెన్‌స్కీ తెలిపారు. రష్యా దాడులను దీటుగా ఎదుర్కొనేందుకు స్వదేశీ రక్షణ రంగ పరికరాల ఉత్పత్తిని వేగవంతం చేస్తున్నట్లు ఆయన పేర్కొన్నారు.
