ఎల్ఏ ఆసుపత్రి వద్ద ఉద్రిక్తత: ఇద్దరి నిర్బంధం, నిత్య రామన్ ఖండన

సూర్య ఇంటర్నేషనల్ డెస్క్: అమెరికాలోని లాస్ ఏంజెల్స్ నగరంలో ఇమిగ్రేషన్ అధికారుల తీరు తీవ్ర వివాదాస్పదంగా మారింది. బోయల్ హైట్స్ ప్రాంతంలోని 'అడ్వెంటిస్ట్ హెల్త్ వైట్ మెమోరియల్ ఆసుపత్రి' వెలుపల ఇమిగ్రేషన్ అండ్ కస్టమ్స్ ఎన్‌ఫోర్స్‌మెంట్ (ఐస్ - ICE) ఏజెంట్ల కార్యకలాపాలకు వ్యతిరేకంగా పెద్ద ఎత్తున నిరసన ప్రదర్శనలు నిర్వహించిన ఆందోళనకారుల్లో ఇద్దరిని ఫెడరల్ అధికారులు అదుపులోకి తీసుకున్నారు. ఒక వ్యక్తిని వైద్య చికిత్స కోసం ఆసుపత్రికి తరలిస్తుండగా ఈ నిరసనలు మొదలయ్యాయి. ఈ సందర్భంగా నిరసనకారులను అడ్డుకునే క్రమంలో ఫెడరల్ ఏజెంట్లపై దాడికి దిగారనే ఆరోపణలతో ఇద్దరిని నిర్బంధించినట్లు తెలుస్తోంది.

ఆసుపత్రుల వద్ద ఫెడరల్ ఏజెన్సీలు ఈ తరహా దూకుడు చర్యలకు పాల్పడటంపై స్థానిక రాజకీయ నేతలు, ప్రజాప్రతినిధులు తీవ్ర ఆగ్రహం వ్యక్తం చేశారు. నూతనంగా ఎన్నికైన లాస్ ఏంజెల్స్ నాయకురాలు నిత్య రామన్ ఈ ఫెడరల్ ఆపరేషన్‌ను తీవ్రంగా ఖండించారు. వైద్య కేంద్రాలు రోగులు, వారి కుటుంబాలకు అత్యంత సురక్షితమైన ప్రదేశాలని, అలాంటి సున్నితమైన ప్రాంతాల్లో భయాందోళనలు సృష్టించేలా వ్యవహరించడం పౌర హక్కులకు గొడ్డలిపెట్టు అని ఆమె మండిపడ్డారు. ఆసుపత్రి యాజమాన్యం కూడా ఈ వివాదంపై స్పందిస్తూ, తాము ఇమిగ్రేషన్ ఎన్‌ఫోర్స్‌మెంట్ చర్యల్లో పాలుపంచుకోలేదని, అత్యవసర అంబులెన్స్ మార్గాలకు ఆటంకం కలిగించే చర్యలను సమర్థించబోమని స్పష్టం చేసింది. మరోవైపు శనివారం కూడా వందలాది మంది ప్రజలు ఆసుపత్రి వద్దకు చేరుకుని ఫెడరల్ చర్యలకు వ్యతిరేకంగా నిరసనలు కొనసాగించడంతో ఉద్రిక్త వాతావరణం నెలకొంది.