వైట్‌హౌస్ నూతన చీఫ్ ఆఫ్ స్టాఫ్‌గా స్టీఫెన్ మిల్లర్
సూర్య ఇంటర్నేషనల్ డెస్క్: అమెరికా అధ్యక్షుడు డొనాల్డ్ ట్రంప్ తన అత్యంత సన్నిహితుడు, విశ్వసనీయ విధాన రూపకర్త స్టీఫెన్ మిల్లర్‌ను వైట్‌హౌస్ నూతన చీఫ్ ఆఫ్ స్టాఫ్‌గా నియమించారు. ఇప్పటివరకు ఈ అత్యున్నత బాధ్యతలను నిర్వహించిన సుజీ వైల్స్ వైదొలగడంతో, ఆమె స్థానంలో 33వ వైట్‌హౌస్ చీఫ్ ఆఫ్ స్టాఫ్‌గా 41 ఏళ్ల మిల్లర్ బాధ్యతలు చేపట్టనున్నారు. అధ్యక్ష కార్యాలయంలో విధాన నిర్ణయాలు, పరిపాలనా సమన్వయంలో అత్యంత శక్తివంతమైనదిగా భావించే ఈ స్థానంలో మిల్లర్‌ను నియమించడం అమెరికా రాజకీయాల్లో ప్రాధాన్యతను సంతరించుకుంది.
సుజీ వైల్స్ ఇప్పటివరకు అద్భుతంగా సేవలందించారని కొనియాడిన ట్రంప్, పరిపాలనా వ్యూహాల్లో భాగంగా కొన్ని మార్పులు తప్పవని పేర్కొన్నారు. స్టీఫెన్ మిల్లర్ తన రాజకీయ ప్రస్థానం ప్రారంభమైనప్పటి నుంచి వెన్నంటి ఉన్నారని, అంకితభావం కలిగిన సమర్థుడని ట్రంప్ ప్రశంసించారు. గతంలో వైట్‌హౌస్ డెప్యూటీ చీఫ్ ఆఫ్ స్టాఫ్‌గా, హోమ్‌ల్యాండ్ సెక్యూరిటీ సలహాదారుగా పనిచేసిన మిల్లర్, ట్రంప్ మొదటి విడత అధికారంలో ఉన్నప్పుడు కూడా సీనియర్ అడ్వైజర్‌గా వ్యవహరించారు.
ట్రంప్ ప్రభుత్వ కఠిన వలస విధానాల రూపకల్పనలో కీలక పాత్ర పోషించిన స్టీఫెన్ మిల్లర్ నియామకంపై విపక్ష డెమొక్రాట్లు తీవ్ర ఆగ్రహం వ్యక్తం చేస్తుండగా, రిపబ్లికన్ నాయకులు మాత్రం దీనిని స్వాగతించారు. తాజా నియామకంతో ట్రంప్ పరిపాలన 'అమెరికా ఫస్ట్' అజెండాను మరింత దూకుడుగా అమలు చేసే అవకాశం ఉందని అంతర్జాతీయ విశ్లేషకులు భావిస్తున్నారు.
