రోడ్డుపై విమానం ఎమర్జెన్సీ ల్యాండింగ్: పికప్ ట్రక్కును ఢీకొన్న దృశ్యాలు

సూర్య ఇంటర్నేషనల్ డెస్క్: అమెరికాలోని ఫ్లోరిడా రాష్ట్రంలో గల నార్త్ ఫోర్ట్ మైయర్స్ ప్రాంతంలో ఒళ్లు గగుర్పొడిచే విమాన ప్రమాదం చోటుచేసుకుంది. గాల్లో ఉండగా ఇంజిన్‌లో సాంకేతిక లోపం తలెత్తడంతో ఒక చిన్న తరహా విమానం రద్దీగా ఉండే ప్రధాన రహదారిపై అత్యవసరంగా ల్యాండ్ అయ్యేందుకు ప్రయత్నించింది. ఈ క్రమంలో అదుపుతప్పిన విమానం రోడ్డుపై ప్రయాణిస్తున్న ఒక పికప్ ట్రక్కును బలంగా ఢీకొట్టింది. సినిమా సన్నివేశాన్ని తలపించేలా జరిగిన ఈ భయంకర దృశ్యాలు సమీపంలోని వాహనదారుల డాష్‌క్యామ్‌లో రికార్డయి సోషల్ మీడియాలో విపరీతంగా వైరల్ అవుతున్నాయి.

అధికార వర్గాల సమాచారం ప్రకారం.. విమానం ఇంజిన్ ఆగిపోవడంతో సమీపంలో ఎయిర్‌పోర్టు అందుబాటులో లేక పైలట్ చాకచక్యంగా రహదారిపైకి విమానాన్ని దించే ప్రయత్నం చేశారు. అయితే నేలను తాకే క్రమంలో విమానం రెక్క, చక్రాలు రోడ్డుపై వెళ్తున్న పికప్ ట్రక్కు పైభాగాన్ని బలంగా తాకడంతో ట్రక్కు పైకప్పు పూర్తిగా ధ్వంసమై శకలాలు రోడ్డుపై చెల్లాచెదురుగా పడ్డాయి. ఆ సమయంలో భారీ శబ్దంతో మంటలు చెలరేగే అవకాశం ఉన్నప్పటికీ, అదృష్టవశాత్తూ ఇంధన ట్యాంక్ పేలిపోకపోవడంతో పెను విపత్తు తప్పింది.

ఈ పెను ప్రమాదం నుంచి విమానంలో ఉన్న పైలట్‌తో పాటు పికప్ ట్రక్కు డ్రైవర్ తృటిలో ప్రాణాలతో బయటపడటం నిజమైన అద్భుతమని ప్రత్యక్ష సాక్షులు పేర్కొన్నారు. ఘటనలో స్వల్పంగా గాయపడిన వారిని అత్యవసర సహాయక బృందాలు సమీప ఆసుపత్రికి తరలించి చికిత్స అందించాయి. ప్రమాదం కారణంగా ఆ మార్గంలో ట్రాఫిక్‌ను తాత్కాలికంగా నిలిపివేసి విమాన శకలాలను తొలగించారు. ఈ విమాన ప్రమాదానికి గల ఖచ్చితమైన కారణాలపై ఫెడరల్ ఏవియేషన్ అడ్మినిస్ట్రేషన్ , నేషనల్ ట్రాన్స్‌పోర్టేషన్ సేఫ్టీ బోర్డ్ (NTSB) సంయుక్తంగా సమగ్ర దర్యాప్తు ప్రారంభించాయి.