international
పీట్ హెగ్సెత్ రాజీనామాకు ఒత్తిడి
వాషింగ్టన్:అమెరికా మిడ్ టర్మ్ ఎన్నికల్లో రిపబ్లికన్ పార్టీ ఎదుర్కొన్న ఓటమి ప్రభావం దేశ రక్షణ కార్యదర్శి పీట్ హెగ్సెత్‌పై తీవ్రంగా పడింది. కాంగ్రెస్ ముందస్తు అనుమతి లేకుండా ఇరాన్‌పై సైనిక దాడులు జరపడం, స్పష్టమైన వ్యూహం లేకుండా యుద్ధాన్ని పొడిగించారనే ఆరోపణలు ఆయనపై వెల్లువెత్తడంతో వెంటనే పదవి నుంచి తప్పుకోవాలని సొంత పార్టీతో పాటు ప్రత్యర్థి వర్గాల నుంచి తీవ్ర ఒత్తిడి పెరుగుతోంది.
ఇప్పటికే రిపబ్లికన్ పార్టీ ప్రతినిధి థామస్ మాస్సీ స్పందిస్తూ, హెగ్సెత్ స్వచ్ఛందంగా రాజీనామా చేయకపోతే వచ్చే వారం కాంగ్రెస్ వేదికగా ఆయనపై అభిశంసన తీర్మానం ప్రవేశపెడతానని అల్టిమేటం జారీ చేశారు. మరోవైపు, ఈ ఎన్నికల ఫలితాలతో కాంగ్రెస్‌లో పట్టు సాధించిన డెమొక్రాట్లు సైతం ఇరాన్ దాడులతో పాటు సీనియర్ సైనిక అధికారుల తొలగింపు నిర్ణయాలపై సమగ్ర విచారణకు సమాయత్తమవుతున్నారు.
అధ్యక్షుడి మద్దతు తనకు సంపూర్ణంగా ఉందంటూ హెగ్సెత్ ఈ ఆరోపణలను కొట్టిపారేస్తున్నప్పటికీ, సొంత పార్టీ నేతల నుంచే అభిశంసన హెచ్చరికలు రావడంతో ఆయన పదవిలో కొనసాగడంపై సర్వత్రా ఉత్కంఠ నెలకొంది.
