పసిఫిక్ దీవుల అభివృద్ధికి భారత్ ప్రత్యేక సామర్థ్య పెంపు శిక్షణ

ఐరాస వేదికగా విదేశాంగ మంత్రి జైశంకర్ పిలుపు!
సూర్య అంతర్జాతీయ డెస్క్: పసిఫిక్ ప్రాంత దేశాల నిర్దిష్ట ప్రాధాన్యతలకు అనుగుణంగా ప్రత్యేక సామర్థ్య పెంపు (Capacity-Building) శిక్షణా కార్యక్రమాలను రూపొందించేందుకు భారతదేశం సిద్ధంగా ఉందని భారత విదేశాంగ మంత్రి డాక్టర్ ఎస్. జైశంకర్ స్పష్టం చేశారు. న్యూయార్క్‌లో జరుగుతున్న 81వ ఐక్యరాజ్యసమితి సాధారణ సభ (యుఎన్‌జీఏ) సమావేశాల సందర్భంగా బుధవారం నిర్వహించిన 'ఫోరమ్ ఫర్ ఇండియా-పసిఫిక్ ఐలాండ్స్ కోఆపరేషన్' (ఫిపిక్ - FIPIC) రెండో విదేశాంగ మంత్రుల సమావేశానికి ఆయన అధ్యక్షత వహించారు. ఈ సందర్భంగా జైశంకర్ మాట్లాడుతూ.. పసిఫిక్ దీవుల నిపుణులు భారతదేశానికి వచ్చి ఇక్కడ ప్రత్యేక రంగాలు, సాంకేతిక అంశాలలో శిక్షణ పొందేలా నూతన అభివృద్ధి ప్రాజెక్టులను సగర్వంగా ప్రకటిస్తున్నట్లు వెల్లడించారు.

ఈ సమావేశంలో ఫిజీ, పాపువా న్యూగినియా, సమోవా, సాలమన్ ఐలాండ్స్, తువాలు, పలావు, టోంగా సహా పలు పసిఫిక్ ఐలాండ్ కంట్రీస్ (పిఐసి) విదేశాంగ మంత్రులు, సీనియర్ అధికారులు పాల్గొని భారత్‌తో ఉన్న ద్వైపాక్షిక భాగస్వామ్యాన్ని సమీక్షించారు. 2023లో ప్రధాని నరేంద్ర మోదీ ప్రకటించిన 12 అంశాల కార్యాచరణ ప్రణాళిక పురోగతిని సభ్య దేశాలు కొనియాడాయి. ఫిజీలో నిర్మిస్తున్న 100 పడకల సూపర్‌ స్పెషాలిటీ ఆసుపత్రి ప్రాంతీయ ఆరోగ్య అవసరాలను తీరుస్తుందని, పలు పసిఫిక్ దేశాలకు కిడ్నీ డయాలసిస్ యంత్రాలు, సముద్ర అంబులెన్సులు అందించే ప్రక్రియ వేగంగా జరుగుతోందని జైశంకర్ తెలిపారు. అంతేకాకుండా 14 పసిఫిక్ దేశాల్లోని 2,800 ఇళ్లకు సౌర విద్యుత్ సౌకర్యం కల్పించి, 70 మంది మహిళా సోలార్ ఇంజనీర్లకు శిక్షణ పూర్తి చేశామని వెల్లడించారు. క్విక్-ఇంపాక్ట్ ప్రాజెక్టుల ద్వారా స్థానిక వర్గాలకు నేరుగా లబ్ధి చేకూర్చే ప్రతిపాదనలను పంపాల్సిందిగా ఈ సందర్భంగా పసిఫిక్ దేశాలకు భారత్ ఆహ్వానం పలికింది.