మామిడికుదురు మండల ప్రత్యేక అధికారిగా విజయ భాస్కర్

మామిడికుదురు, మేజర్ న్యూస్ : మండల పరిషత్ అధ్యక్షుల పదవీకాలం సెప్టెంబర్ 23తో ముగియడంతో మామిడికుదురు మండలానికి ప్రత్యేక అధికారిని నియమించారు. అమలాపురం డివిజనల్ డెవలప్‌మెంట్ ఆఫీసర్ (డీడీఓ) విజయ భాస్కర్ను మండల ప్రత్యేక అధికారిగా నియమిస్తూ అధికారులు ఉత్తర్వులు జారీ చేశారు.

ఈ నేపథ్యంలో విజయ భాస్కర్ శుక్రవారం మామిడికుదురు మండల పరిషత్ కార్యాలయంలో ప్రత్యేక అధికారిగా బాధ్యతలు స్వీకరించారు. ఈ సందర్భంగా ఎంపీడీవో భవాని, డిప్యూటీ ఎంపీడీవోలు వెంకటేశ్వరరావు, శ్రీనివాసరావు, మండల పరిషత్ కార్యాలయ ఉద్యోగులు ఆయనకు అభినందనలు తెలిపారు.

బాధ్యతలు స్వీకరించిన అనంతరం విజయ భాస్కర్ మాట్లాడుతూ.. మండల అభివృద్ధి, ప్రజా సమస్యల పరిష్కారంపై ప్రత్యేక దృష్టి సారిస్తానని తెలిపారు. అధికారులు, ప్రజాప్రతినిధుల సమన్వయంతో మండల పరిధిలోని సమస్యలను గుర్తించి వాటి పరిష్కారానికి చర్యలు తీసుకుంటామని పేర్కొన్నారు.

ప్రజలకు ప్రభుత్వ సేవలు సకాలంలో అందేలా అధికారులు సమన్వయంతో పనిచేయాలని ఆయన సూచించారు. మండల అభివృద్ధికి సంబంధించి అన్ని వర్గాల సహకారంతో ముందుకు సాగుతామని విజయ భాస్కర్ తెలిపారు.