రొమ్ము క్యాన్సర్ వస్తే కేవలం గడ్డలే కాదు.. ఈ ఐదు లక్షణాలు కూడా కనిపిస్తాయి జాగ్రత్త!
సూర్య లైఫ్‌స్టైల్ డెస్క్: మహిళల్లో అత్యంత వేగంగా విస్తరిస్తున్న ప్రాణాంతక వ్యాధుల్లో రొమ్ము క్యాన్సర్ ప్రధానమైనదిగా మారింది. చాలా మంది ఈ తీవ్రమైన అనారోగ్య సమస్య బారిన పడి తీవ్ర ఇబ్బందులు ఎదుర్కొంటున్నారు. అయితే వైద్య నిపుణులు చెబుతున్నదాని ప్రకారం, రొమ్ము క్యాన్సర్‌ను తొలి దశలోనే గుర్తించగలిగితే ప్రాణాపాయం నుంచి సులభంగా బయటపడవచ్చు. సాధారణంగా రొమ్ములలో గడ్డలు ఏర్పడితేనే క్యాన్సర్ వస్తుందని అందరూ భావిస్తుంటారు, కానీ గడ్డలు మాత్రమే కాకుండా శరీరంలో మరియు రొమ్ముల భాగంలో కనిపించే మరికొన్ని ఇతర హెచ్చరిక సంకేతాలు కూడా క్యాన్సర్‌కు దారితీస్తాయని ఆరోగ్య నిపుణులు గట్టిగా హెచ్చరిస్తున్నారు.
చాలా సందర్భాల్లో ప్రారంభ దశలో రొమ్ము క్యాన్సర్ ఎలాంటి నొప్పి లేకుండానే మొదలవుతుంది. రొమ్ములు లేదా చంక ప్రాంతంలో గడ్డలు ఏర్పడటం సాధారణ లక్షణమైనప్పటికీ, కొంతమందిలో ఎలాంటి గడ్డలు లేకుండానే క్యాన్సర్ లక్షణాలు బయటపడే అవకాశం ఉంది. ఇందులో ప్రధానంగా రొమ్ముల ఆకారంలో స్పష్టమైన మార్పు రావడం, ఒక రొమ్ము మరొకదాని కంటే గణనీయంగా పెద్దదిగా కనిపించడం లేదా కిందికి జారిపోవడం జరుగుతుంది. అలాగే రొమ్ము చర్మం నారింజ తొక్కలా గరుకుగా మారడం, ఎర్రగా కందిపోవడం, లోపలికి పీక్కుపోవడం లేదా చిన్నపాటి పుండులా ఏర్పడటం వంటి చర్మ సంబంధిత మార్పులను ఎప్పుడూ తేలికగా తీసుకోకూడదు.
వీటితో పాటు చనుమొనలకు సంబంధించిన మార్పులను కూడా మహిళలు ఎల్లప్పుడూ గమనిస్తూ ఉండాలి. చనుమొన లోపలికి ముడుచుకుపోవడం, దాని ఆకారంలో మార్పు రావడం లేదా చనుమొనల నుంచి రక్తం, తెల్లని లేదా పసుపు రంగులో ఎలాంటి ద్రవాలు కారడం జరిగితే వెంటనే వైద్యులను సంప్రదించడం చాలా ముఖ్యం. అలాగే చంకలో వాపు లేదా నొప్పి ఉండటం, నెలసరి సమయంతో సంబంధం లేకుండా రొమ్ములో నిరంతరంగా నొప్పి వేధించడం కూడా ప్రమాదకర సంకేతాలేనని వైద్యులు స్పష్టం చేస్తున్నారు. జన్యుపరమైన కారణాలు, కుటుంబ చరిత్ర, వయసు పెరగడం, ఊబకాయం మరియు అనారోగ్యకరమైన జీవనశైలి వంటివి ఈ ముప్పును మరింత పెంచుతాయి.
