రణ్బీర్ కపూర్ పుట్టినరోజు కానుకగా ‘రామాయణం’ స్పెషల్ బీటీఎస్ గ్లింప్స్ విడుదల!
సూర్య ఎంటర్టైన్మెంట్ డెస్క్: భారతీయ చలనచిత్ర చరిత్రలో అత్యంత ప్రతిష్టాత్మకంగా తెరకెక్కుతున్న పౌరాణిక దృశ్యకావ్యం ‘రామాయణం’ సినిమాకు సంబంధించి మేకర్స్ ప్రేక్షకులకు అదిరిపోయే కానుకను అందించారు. బాలీవుడ్ స్టార్ హీరో రణ్బీర్ కపూర్ పుట్టినరోజును పురస్కరించుకుని చిత్ర యూనిట్ ఒక ప్రత్యేకమైన బిహైండ్ ది సీన్స్ (BTS) గ్లింప్స్ను విడుదల చేసింది. ఈ వీడియోలో శ్రీరాముడి పాత్రలో రణ్బీర్ కపూర్ లుక్, ఆయన చేసిన మేకోవర్, ఈ భారీ ప్రాజెక్ట్ కోసం పడిన కష్టానికి సంబంధించిన ఆసక్తికర విషయాలు వెల్లడయ్యాయి. కోట్లాది మంది ప్రజల మనసుల్లో దేవుడిగా కొలువైన శ్రీరాముడి పాత్రకు ప్రాణం పోసేందుకు రణ్బీర్ ఎంతగా శ్రమించారో ఈ గ్లింప్స్ స్పష్టం చేస్తోంది.
ఈ ఇతిహాస కథను వెండితెరపై ఆవిష్కరించడం ఎంత బాధ్యతతో కూడుకున్నదో దర్శకుడు నితేశ్ తివారీ ఈ వీడియోలో పంచుకున్నారు. కోట్లాది మంది ప్రజల విశ్వాసం, భావోద్వేగాలతో ముడిపడి ఉన్న శ్రీరాముడి పాత్రకు సరైన నటుడిని ఎంపిక చేయడం సవాలుగా మారిందని తెలిపారు. ఇక ఈ పాత్ర గురించి రణ్బీర్ కపూర్ స్పందిస్తూ, దీనిని కేవలం ఒక సినిమాలోని సాధారణ పాత్రలా తాను చూడలేదని, శ్రీరాముడి పాత్రకు పూర్తిస్థాయిలో చేయడం తన ప్రధాన బాధ్యతగా భావించానని పేర్కొన్నారు. ఈ ప్రాజెక్ట్లో తనతో పాటు పని చేస్తున్న సహనటులు అరుణ్ గోవిల్, సాయి పల్లవి, రవి దూబే తదితరులు రణ్బీర్ అంకితభావం గురించి ప్రశంసిస్తూ తమ అనుభవాలను పంచుకున్నారు.
ప్రపంచస్థాయి సాంకేతిక విలువలతో ఈ చిత్రాన్ని తెరకెక్కిస్తున్నట్లు ప్రొడ్యూసర్ నమిత్ మల్హోత్రా ఈ వీడియో ద్వారా వెల్లడించారు. మన దేశంలోని సాంస్కృతిక విలువలను కాపాడుతూనే, హాలీవుడ్ స్థాయి టెక్నికల్ నిపుణులను ఈ సినిమా కోసం రంగంలోకి దించారు. ప్రముఖ యాక్షన్ డైరెక్టర్ టెర్రీ నోటరీ ఆధ్వర్యంలో రణ్బీర్ కపూర్ ఈ చిత్రంలోని క్లిష్టమైన పోరాట సన్నివేశాల కోసం ప్రత్యేక శిక్షణ పొందారు. సినిమాలోని గ్రాఫిక్స్, విజువల్ ఎఫెక్ట్స్ మరియు మేకింగ్ స్టైల్ ప్రేక్షకులను విజువల్ వండర్లా అలరించనున్నాయని తాజా గ్లింప్స్ చూస్తే అర్థమవుతోంది.
నితేశ్ తివారీ దర్శకత్వంలో రూపుదిద్దుకుంటున్న ఈ భారీ పాన్ ఇండియా చిత్రాన్ని ప్రైమ్ ఫోకస్ స్టూడియోస్, ఆస్కార్ అవార్డు గ్రహీత డీఎన్ఈజీ (DNEG), మాన్స్టర్ మైండ్ క్రియేషన్స్ సంస్థలు సంయుక్తంగా అత్యంత భారీ బడ్జెట్తో నిర్మిస్తున్నాయి. ఈ చిత్రంలో రణ్బీర్ కపూర్ సరసన సీతగా సాయి పల్లవి నటిస్తుండగా, రావణుడిగా రాకింగ్ స్టార్ యశ్, హనుమంతుడిగా సన్నీ డియోల్, లక్ష్మణుడిగా రవి దూబే, దశరథుడిగా అరుణ్ గోవిల్ కీలక పాత్రలు పోషిస్తున్నారు. ఈ ప్రాజెక్ట్ను రెండు భాగాలుగా విడుదల చేయనుండగా, మొదటి భాగం దీపావళి 2026లో, రెండో భాగం దీపావళి 2027లో ప్రపంచవ్యాప్తంగా ఐమ్యాక్స్ (IMAX) ఫార్మాట్లో విడుదల కానుంది. హిందీతో పాటు తెలుగు, తమిళ, కన్నడ, మలయాళ భాషల్లో ఈ చిత్రం ప్రేక్షకుల ముందుకు రానుంది.
