లాస్ ఏంజెల్స్‌లో యష్ పిల్లల 'రామయణం' సందడి!
రాకింగ్ స్టార్ యష్, రాధిక పండిట్ దంపతుల పిల్లలు అయ్ర, యథర్వ తమ జీవితంలో మొదటిసారిగా ఒక పెద్ద థియేటర్‌లో సినిమా చూసే అరుదైన అనుభవాన్ని సొంతం చేసుకున్నారు. నమిత్ మల్హోత్రా ప్రతిష్టాత్మకంగా తెరకెక్కించిన భారీ పౌరాణిక చిత్రం 'రామయణం' ప్రత్యేక ప్రదర్శన లాస్ ఏంజెల్స్‌లో ఘనంగా జరిగింది. ఈ వేడుకకు యష్ తన కుటుంబంతో కలిసి హాజరయ్యారు.
ఈ చిత్రంలో యష్ అత్యంత శక్తివంతమైన రావణాసురుడి పాత్రలో నటిస్తుండటంతో పాటు, తన 'మాన్‌స్టర్ మైండ్ క్రియేషన్స్' సంస్థపై ఈ ప్రాజెక్ట్‌కు సహ-నిర్మాతగా కూడా వ్యవహరిస్తున్నారు. భారతీయ సంస్కృతి, సాంప్రదాయాలకు ప్రతీక అయిన 'రామయణం' ఇతిహాసంతో తమ పిల్లలు థియేటర్ అనుభూతిని ప్రారంభించడం పట్ల ఆ దంపతులు సంతోషం వ్యక్తం చేశారు.
యథర్వ పుట్టినరోజు సందర్భంగా ఈ ప్రత్యేక ప్రదర్శన జరగడం విశేషం. నితీష్ తివారీ దర్శకత్వంలో తెరకెక్కుతున్న ఈ దృశ్యకావ్యంలో రణబీర్ కపూర్ రాముడిగా, సాయి పల్లవి సీతగా నటిస్తుండగా, సినిమాపై ప్రపంచవ్యాప్తంగా భారీ అంచనాలు నెలకొన్నాయి.
తండ్రి సినీ ప్రయాణంలో మైలురాయిగా నిలిచే ఈ భారీ ప్రాజెక్ట్‌తోనే తమ పిల్లలు వెండితెర ప్రపంచంలోకి అడుగుపెట్టడం ఈ కుటుంబానికి ఒక తీపి గుర్తుగా మారనుంది.
