35 ఏళ్ల క్రితం మిస్సైన విమానం.. ఊహించని ట్విస్టులతో జేఎల్ 50 వెబ్ సిరీస్ సందడి
సూర్య ఎంటర్టైన్మెంట్ డెస్క్: ఓటీటీ వేదికలపై సస్పెన్స్, సైన్స్ ఫిక్షన్, టైమ్ ట్రావెల్ నేపథ్యంలో సాగే కథలకు ప్రేక్షకుల్లో ఎప్పుడూ ప్రత్యేక ఆదరణ ఉంటుంది. ఈ కోవలో రూపొందిన ఆసక్తికరమైన మినీ వెబ్ సిరీస్ జేఎల్ 50 మరోసారి సినీ ప్రియుల దృష్టిని ఆకర్షిస్తోంది. కేవలం నాలుగు ఎపిసోడ్లతో ఉత్కంఠభరితంగా సాగే ఈ సిరీస్ ఐఎండీబీలో 7.3 రేటింగ్ సొంతం చేసుకుని ప్రస్తుతం సోనీ లివ్ ఓటీటీలో స్ట్రీమింగ్ అవుతోంది. అభయ్ డియోల్, పంకజ్ కపూర్, పీయూష్ మిశ్రా ప్రధాన పాత్రల్లో నటించిన ఈ కథ సీబీఐ అధికారి శంతను దర్యాప్తు చుట్టూ తిరుగుతుంది.
పశ్చిమ బెంగాల్లోని కొండ ప్రాంతంలో జరిగిన విమాన ప్రమాద కేసును విచారించేందుకు శంతను రంగంలోకి దిగుతాడు. తొలుత ఉగ్రవాదుల హైజాక్ ఘటనగా భావించినప్పటికీ, దర్యాప్తులో విస్తుపోయే నిజం వెలుగులోకి వస్తుంది. ఆ విమానం 1984లో కోల్కతా నుంచి బయలుదేరి కొద్దిసేపటికే అదృశ్యమైన ఫ్లైట్ జేఎల్ 50గా తేలుతుంది. ప్రమాదానికి గురైన విమానం కాక్పిట్లో పైలట్ బిహు ఘోష్, ప్రొఫెసర్ బిస్వజిత్ చంద్ర మిత్రా ప్రాణాలతో బయటపడతారు. తాము 35 ఏళ్లు భవిష్యత్తులోకి వచ్చేశామని తెలిసి పైలట్ షాక్ అవ్వగా, ప్రొఫెసర్ మిత్రా మాత్రం ఆనందంతో సంబరాలు చేసుకుంటాడు.
ఈ రహస్యాన్ని ఛేదించేందుకు శంతను క్వాంటమ్ ఫిజిక్స్ ప్రొఫెసర్ సుబ్రతో దాస్ సహాయం తీసుకుంటాడు. గత ప్రభుత్వం రహస్యంగా నిర్వహించిన వార్మ్హోల్ ప్రాజెక్ట్ ద్వారా 35 గంటలు భవిష్యత్తులోకి వెళ్లాలని ప్రొఫెసర్ మిత్రా విమానాన్ని హైజాక్ చేయగా, సాంకేతిక లోపం కారణంగా ఏకంగా 35 ఏళ్లు ముందుకు వచ్చేసినట్లు తెలుస్తుంది. ఆ ప్రమాదాన్ని, హైజాక్ను నివారించేందుకు శంతను తిరిగి 1984లోకి టైమ్ ట్రావెల్ చేస్తాడు. ఆ ప్రయాణంలో పైలట్ బిహు తన కన్నతల్లి అని, తనను చిన్నప్పుడు అనాథాశ్రమంలో వదిలేసిన వ్యక్తి తన తాతయ్య అని తెలుసుకుని శంతను భావోద్వేగానికి గురవుతాడు.
శైలేంద్ర వ్యాస్ దర్శకత్వం వహించిన ఈ ప్రాజెక్టును మొదట 2017లో సినిమాగా చిత్రీకరించినప్పటికీ, ఆ తర్వాత 2020లో నాలుగు ఎపిసోడ్ల వెబ్ సిరీస్గా సోనీ లివ్లో విడుదల చేశారు. మక్బూల్ చిత్రం తర్వాత పంకజ్ కపూర్, పీయూష్ మిశ్రా దాదాపు పదహారు ఏళ్ల విరామం తర్వాత మళ్లీ కలిసి నటించడం ఈ సిరీస్లో మరో ప్రత్యేకత. తక్కువ నిడివిలో ఆద్యంతం ఉత్కంఠను పంచే సైన్స్ ఫిక్షన్ థ్రిల్లర్ చూడాలనుకునే వారికి ఈ సిరీస్ మంచి ఎంపికగా నిలుస్తోంది.
Also Read: మిస్కిన్ వీడియో వివాదంపై కీర్తి సురేశ్ ఘాటు స్పందన.. తండ్రీకూతుళ్ల అనుబంధం అంటూ క్లారిటీ