గోవా అంతర్జాతీయ చలనచిత్రోత్సవంలో తమిళ చిత్రం కూడు.. గాలా ప్రీమియర్కు ఎంపిక
సూర్య ఎంటర్టైన్మెంట్ డెస్క్: గోవా వేదికగా నవంబర్ 20 నుంచి 28 వరకు జరుగుతున్న 57వ భారత అంతర్జాతీయ చలనచిత్రోత్సవంలో తమిళ చిత్రం కూడు ప్రత్యేకంగా నిలిచింది. ఈ ప్రతిష్ఠాత్మక వేడుకలో గాలా ప్రీమియర్ ఫీచర్ ఫిల్మ్ విభాగంలో ప్రదర్శితమయ్యేందుకు ఈ చిత్రం ఎంపికైంది. జోయల్ విజయ్ దర్శకుడిగా పరిచయమవుతున్న ఈ సినిమాలో వీజే కతిరవన్, జయప్రకాశ్, వివేక్ ప్రసన్న, దేవికా సతీశ్, రచిత మహాలక్ష్మి వంటి నటులు కీలక పాత్రల్లో నటించారు. పనోరమా స్టూడియోస్, స్కైమూన్ ఎంటర్టైన్మెంట్, కల్ట్ డిజిటల్ సంస్థలు సంయుక్తంగా ఈ ప్రాజెక్టును నిర్మించాయి.
మనుషులకు, ప్రకృతికి మధ్య ఉండే అనుబంధాన్ని హృద్యంగా ఆవిష్కరించే కథాంశంతో ఈ చిత్రం రూపొందింది. ఒక గ్రామంలోని విద్యుత్ ట్రాన్స్ఫార్మర్లో పక్షులు గూడు కట్టగా, ఆ పక్షులను కాపాడేందుకు గ్రామస్తులు తీసుకునే అసాధారణ నిర్ణయాలు, ఎదురయ్యే పరిణామాల చుట్టూ కథ సాగుతుంది. సాధారణ వ్యక్తుల మానవత్వం, ప్రకృతి పట్ల బాధ్యత, సామాజిక ఐక్యతను చాటిచెప్పేలా తమిళనాడు గ్రామీణ నేపథ్యంలో ఈ చిత్రాన్ని సహజత్వం ఉట్టిపడేలా తెరకెక్కించారు.
ఈ ఎంపికపై స్పందించిన నిర్మాత కుమార్ మంగట్ పాఠక్, కూడు విభిన్నమైన కథతో రూపొందిందని, ఇలాంటి చిత్రాలను అంతర్జాతీయ ప్రేక్షకులకు చేరువ చేయడానికి అంతర్జాతీయ చలనచిత్రోత్సవం సరైన వేదిక అని పేర్కొన్నారు. కష్టమైన సవాళ్లను అధిగమించి ఈ కథను తెరపైకి తీసుకురావడం ఒకప్పుడు అసాధ్యంగా అనిపించినా, ఇప్పుడు దేశంలోని ప్రధాన చలనచిత్రోత్సవంలో చోటు దక్కడం ఎంతో సంతోషంగా ఉందని దర్శకుడు జోయల్ విజయ్ ఆనందం వ్యక్తం చేశారు.
డేవిడ్ విలియమ్స్ కథ అందించిన ఈ చిత్రానికి మనోజ్ కృష్ణ సంగీతం సమకూర్చారు. కుమార్ మంగట్ పాఠక్, అభిషేక్ పాఠక్, ఎం. గణేశ్, సునీల్ జైన్, ఆదిత్య జోషి, లిషా పి. చంద్రన్ నిర్మాతలుగా వ్యవహరిస్తున్నారు. గోవా చలనచిత్రోత్సవంలో ప్రదర్శన అనంతరం ఈ చిత్రాన్ని 2027 ప్రారంభంలో ప్రపంచవ్యాప్తంగా థియేటర్లలో విడుదల చేసేందుకు చిత్ర బృందం సన్నాహాలు చేస్తోంది.