పోర్ట్స్ క్యూ2 ఫలితాల ప్రివ్యూ: అంతరాయాలున్నా సానుకూలంగానే కార్గో అవుట్‌లుక్..
పీఎల్ క్యాపిటల్ ‘టాప్ పిక్’గా అదానీ పోర్ట్స్!
సూర్య బిజినెస్ డెస్క్: ప్రస్తుత ఆర్థిక సంవత్సరం రెండో త్రైమాసికం (క్యూ2)లో ప్రపంచవ్యాప్త భౌగోళిక రాజకీయ ఉద్రిక్తతలు, నౌకాయాన మార్గాల్లో అంతరాయాలు, రుతుపవనాల ప్రభావం ఎదురైనప్పటికీ.. భారత రేవుల రవాణా రంగం (పోర్ట్స్ సెక్టార్) పటిష్ట పనితీరును కనబరుస్తుందని ప్రముఖ బ్రోకరేజ్ సంస్థ ‘పీఎల్ క్యాపిటల్’ (ప్రభుదాస్ లీలాధర్) తన తాజా ప్రివ్యూ నివేదికలో వెల్లడించింది. కార్గో పరిమాణాల్లో స్థిరమైన వృద్ధి నమోదువుతున్న నేపథ్యంలో రంగంపై బుల్లిష్ దృక్పథాన్ని వ్యక్తం చేస్తూ, ఈ విభాగంలో దేశీయ ప్రైవేట్ పోర్ట్ దిగ్గజం 'అదానీ పోర్ట్స్ & స్పెషల్ ఎకనామిక్ జోన్' ను తమ 'టాప్ పిక్'గా ఎంపిక చేసింది.
రెడ్ సీ సంక్షోభం మరియు సరఫరా గొలుసులో నెలకొన్న సవాళ్లు కంటైనర్ రవాణా వ్యయాలను పెంచినప్పటికీ, భారత్‌లో పారిశ్రామిక కార్యకలాపాలు, బొగ్గు, ఎరువులు మరియు ముడి చమురు దిగుమతులు బలంగా ఉండటం కార్గో వాల్యూమ్‌లకు అండగా నిలిచిందని బ్రోకరేజ్ సంస్థ విశ్లేషించింది. ముఖ్యంగా అదానీ పోర్ట్స్ విభిన్న పోర్ట్ లొకేషన్లు, సమగ్ర లాజిస్టిక్స్ సేవలు మరియు రైల్ కనెక్టివిటీ కారణంగా మార్కెట్ సవాళ్లను సమర్థవంతంగా అధిగమిస్తూ రికార్డు స్థాయి కార్గో హ్యాండ్లింగ్‌ను కొనసాగిస్తోంది.
అదానీ పోర్ట్స్ దేశవ్యాప్తంగా తన మార్కెట్ వాటాను నిరంతరం పెంచుకోవడంతో పాటు విదేశీ ప్రాజెక్టుల విస్తరణ, ఈబీఐటీడీఏ మార్జిన్ల స్థిరత్వం కంపెనీ ఆర్థిక ప్రగతికి ఊతమిస్తున్నాయని పీఎల్ క్యాపిటల్ పేర్కొంది. సంస్థ షేరుపై ‘బై’ రేటింగ్‌ను కొనసాగిస్తూ ఆకర్షణీయమైన అప్‌సైడ్ టార్గెట్ ప్రైస్‌ను నిర్దేశించింది. రాబోయే పండుగల సీజన్ డిమాండ్, అంతర్జాతీయ వాణిజ్య మార్గాల్లో రద్దీ సర్దుబాటు కావడం ద్వారా ద్వితీయార్థంలో పోర్ట్ రంగ కంపెనీల ఆదాయాలు మరింత పుంజుకుంటాయని మార్కెట్ వర్గాలు భావిస్తున్నాయి.
