ధరలు పెరుగుతున్నా..యూఏఈలో తగ్గిన పెట్రోల్, డీజిల్ ధరలు

సూర్య అంతర్జాతీయ డెస్క్: అంతర్జాతీయంగా ముడి చమురు ధరల్లో అనిశ్చితి నెలకొన్నప్పటికీ, గల్ఫ్ దేశమైన యునైటెడ్ అరబ్ ఎమిరేట్స్ (యూఏఈ) వినియోగదారులకు ఊరటనిచ్చే నిర్ణయం తీసుకుంది. నవంబర్ నెలకూ సంబంధించి ఇంధన ధరలను సవరిస్తూ యూఏఈ ఫ్యూయల్ ప్రైస్ కమిటీ అధికారిక ప్రకటన విడుదల చేసింది. అంతర్జాతీయంగా క్రూడాయిడ్ ధరలు పెరుగుతున్న ధోరణి కనిపిస్తున్నప్పటికీ, దేశీయంగా మాత్రం పెట్రోల్ మరియు డీజిల్ ధరలను తగ్గిస్తూ నిర్ణయం తీసుకోవడం వాహనదారులకు పెద్ద ఎత్తున ఉపశమనాన్ని కలిగించింది.

సవరించిన కొత్త ధరల ప్రకారం, సూపర్ 98 పెట్రోల్ లీటర్‌కు గత నెలలో ఉన్న 4.40 దిర్హామ్‌ల నుండి 4.16 దిర్హామ్‌లకు తగ్గింది. అలాగే స్పెషల్ 95 పెట్రోల్ ధర లీటర్‌కు 4.28 దిర్హామ్‌ల నుండి 4.04 దిర్హామ్‌లకు, ఈ-ప్లస్ 91 పెట్రోల్ ధర లీటర్‌కు 4.21 దిర్హామ్‌ల నుండి 3.97 దిర్హామ్‌లకు దిగివచ్చింది. మరోవైపు రవాణా రంగంలో ఎక్కువగా ఉపయోగించే డీజిల్ ధర కూడా స్వల్పంగా తగ్గి లీటర్ 4.80 దిర్హామ్‌ల నుండి 4.75 దిర్హామ్‌లకు చేరింది. ఈ కొత్త ధరలు నవంబర్ 1వ తేదీ నుండి దేశవ్యాప్తంగా అమల్లోకి వచ్చాయి.

యూఏఈలో ప్రతి నెలా గ్లోబల్ మార్కెట్ ఇంధన కదలికలకు అనుగుణంగా ధరలను సవరించే విధానాన్ని అనుసరిస్తుంటారు. గత కొన్ని నెలలుగా ప్రాంతీయ ఉద్రిక్తతలు మరియు సరఫరా సవాళ్ల కారణంగా ఇంధన ధరలు క్రమంగా పెరుగుతూ వచ్చాయి. అయితే తాజా సమీక్షలో పెట్రోల్ ధరలు సుమారు 5.6 శాతం వరకు, డీజిల్ ధరలు 1 శాతం పైగా తగ్గాయని అధికారిక వర్గాలు వెల్లడించాయి. ప్రభుత్వ తీసుకున్న ఈ తాజా నిర్ణయం వల్ల సాధారణ ప్రజలపై, ముఖ్యంగా రోజువారీ ప్రయాణాలు చేసే వాహనదారులపై ఆర్థిక భారం కొంతమేర తగ్గనుంది.