వ్యాదులు ప్రబలకుండా ముందస్తు చర్యలు

పాలకొండ, సూర్య : తుఫాన్ ప్రభావంతో కురిసిన వర్షాలు కారణంగా ఎక్కడా వ్యాదులు ప్రబలకుండా ముందస్తు చర్యలు చేపట్టాలని జిల్లా అసంక్రమిత వ్యాదుల నియంత్రణ అధికారి డాక్టర్ టి. జగన్ మోహనరావు సూచించారు. ఈ సందర్భంగా గురువారం వీరఘట్టం పిహెచ్సీ , జె. గోపాలపురం గ్రామం లను ఆయన సందర్శించారు. ఆసుపత్రి  ఓపి లో నమోదు అయిన ఆరోగ్య వివరాలు, గ్రామాల్లో ఆరోగ్య సమాచారం  తెలుసుకున్నారు. వైద్య శిబిరం పరిశీలించారు. వర్షాలు కారణంగా ఇళ్ళ పరిసరాలు, వీధులలో నీటి నిల్వలు గుర్తించి అందరి సమన్వయంతో వాటిని తొలగించుకోవాలని లేకపోతే దోమలకు ఆవాసాలుగా మారి జ్వరాలు ప్రబలడానికి ఆస్కారం ఉంటుందని, అలగే ఆహారం, త్రాగు నీరు కలుషితం కాకుండా జాగ్రత్త పడాలన్నారు. కాచి చల్లార్చిన నీటిని త్రాగడానికి వినియోగించాలని సూచించారు. అంగన్వాడీ, పాఠశాలను సందర్శించి పిల్లల ఆరోగ్య వివరాలు తెలుసుకొని సిబ్బందికి సూచనలు చేశారు. గ్రామాల్లో వైద్య శిబిరాలు నిర్వహించాలని, మందులు, వైద్య పరీక్షలు అందుబాటులో ఉంచాలని వైద్యాధికారులు, సిబ్బందికి సూచించారు. జిల్లా అధికార యంత్రాంగం సూచనలను ప్రజారోగ్యమే ద్యేయంగా ఎప్పటికప్పుడు అమలు చేయాలన్నారు.  ఈ కార్యక్రమంలో వైద్యాధికారులు డా డి. ప్రదీప్ కుమార్, డా ఎమ్. సాయి కుమార్, డెమో గిరిబాబు, వైద్య సిబ్బంది ఉన్నారు.