విజయలక్ష్మి అలంకారంలో ఆదిలక్ష్మి అమ్మవారి దర్శనం

నెల్లూరు కల్చరల్/రాపూరు మేజర్ న్యూస్ 
శ్రీ పొట్టి శ్రీరాములు నెల్లూరు జిల్లా రాపూరు మండలంలోని ప్రముఖ పుణ్యక్షేత్రమైన పెంచలకోనలో ఆదిలక్ష్మి అమ్మవారి శరన్నవరాత్రి మహోత్సవాలు అత్యంత వైభవంగా జరుగుతున్నాయి. ఈ ఉత్సవాల్లో భాగంగా 8వ రోజైన ఆదివారం అమ్మవారికి ప్రత్యేక పూజలు, అలంకారాలు శాస్త్రోక్తంగా నిర్వహించారు.
ఉదయం వేళ ఆలయంలో అమ్మవారికి నయనానందకరంగా ప్రత్యేక పుష్పాలంకరణ చేపట్టారు. అనంతరం ఉదయం ప్రధానార్చకులు, వేద పండితుల వేద మంత్రోచ్ఛారణలు, మంగళ వాయిద్యాల నడుమ అమ్మవారికి విశేషంగా స్నపన తిరుమంజనం మహోత్సవాన్ని శాస్త్రోక్తంగా జరిపించారు.
సాయంత్రం అమ్మవారికి రంగురంగుల పుష్పాలతో శోభాయమానంగా అలంకరణ చేశారు. సాయంత్రం ఆదిలక్ష్మి అమ్మవారు విశేష "శ్రీ విజయలక్ష్మి" అలంకారంలో పద్మపీఠంపై కొలువుదీరి భక్తులకు దివ్య దర్శనమిచ్చారు. ఆలయ ప్రాంగణంలో అమ్మవారి ప్రాకారోత్సవం అత్యంత వైభవోపేతంగా సాగింది. ఉత్సవం అనంతరం మహిళా భక్తుల ఆధ్వర్యంలో సామూహిక కుంకుమార్చన పూజలు భక్తిశ్రద్ధలతో నిర్వహించారు.
ఈ వేడుకలకు సంబంధించిన వివరాలను ఆలయ ఉప కమిషనరు, కార్యనిర్వాహణాధికారి జనార్ధన్ రెడ్డి ఒక ప్రకటనలో తెలిపారు.