విద్యుత్ పునరుద్ధరణ పనులను పరిశీలించిన రాజ్యసభ ఎంపీ సానా సతీష్ బాబు, ఎంపీ హరీశ్
అమలాపురం, మేజర్‌న్యూస్‌ :
అర్నబ్ తుఫాన్ కారణంగా డాక్టర్ బి.ఆర్. అంబేద్కర్ కోనసీమ జిల్లాలో దెబ్బతిన్న విద్యుత్ వ్యవస్థను వీలైనంత త్వరగా పునరుద్ధరించాలని రాజ్యసభ ఎంపీ సానా సతీష్ బాబు, అమలాపురం ఎంపీ హరీశ్ బాలయోగి విద్యుత్ శాఖ అధికారులను ఆదేశించారు.
శనివారం అమలాపురంలో క్షేత్రస్థాయిలో జరుగుతున్న విద్యుత్ సరఫరా పునరుద్ధరణ పనులను ఎంపీ హరీశ్ బాలయోగితో కలిసి రాజ్యసభ ఎంపీ సానా సతీష్ బాబు పరిశీలించారు. దెబ్బతిన్న విద్యుత్ స్తంభాలు, విద్యుత్ లైన్లు, ట్రాన్స్‌ఫార్మర్ల మరమ్మతుల పురోగతిని అధికారులను అడిగి తెలుసుకున్నారు.
విద్యుత్ సరఫరా పునరుద్ధరణ పనులను ప్రాధాన్యత క్రమంలో చేపట్టి, వీలైనంత త్వరగా పూర్తిచేయాలని అధికారులకు సూచించారు. అవసరమైన ప్రాంతాల్లో అదనపు సిబ్బందిని, ప్రత్యేక బృందాలను ఏర్పాటు చేసి మరమ్మతు పనులను వేగవంతం చేయాలని ఆదేశించారు.
తుఫాన్ కారణంగా విద్యుత్ అంతరాయంతో ప్రజలు ఎదుర్కొంటున్న ఇబ్బందులను దృష్టిలో ఉంచుకుని విద్యుత్ శాఖ అధికారులు క్షేత్రస్థాయిలో నిరంతరం అందుబాటులో ఉండాలని ఎంపీ సానా సతీష్ బాబు సూచించారు. ప్రతి ఇంటికి విద్యుత్ సరఫరా పునరుద్ధరించి, ప్రజల సాధారణ జీవన పరిస్థితులను వీలైనంత త్వరగా మెరుగుపరచడమే లక్ష్యంగా పనిచేయాలని స్పష్టం చేశారు. ఈ సందర్భంగా తుఫాన్ ప్రభావిత ప్రాంతాల్లో విద్యుత్ సరఫరా పునరుద్ధరణ కోసం నిరంతరం శ్రమిస్తున్న విద్యుత్ శాఖ సిబ్బంది సేవలను ఎంపీ సానా సతీష్ బాబు ప్రత్యేకంగా అభినందించారు.
