విద్యాసంస్థ అభ్యున్నతికి ప్రసాద్ అందించిన సేవలు భావితరాలకు స్ఫూర్తిదాయకం
నగరం, మేజర్ న్యూస్:
స్థానిక శ్రీ వెలగపూడి రామకృష్ణ స్మారక కళాశాల పాలకవర్గ వైస్ ప్రెసిడెంట్ స్వర్గీయ డాక్టర్ ఎస్ఆర్ కె ప్రసాద్ కళాశాల అభివృద్ధికి అందించిన విశిష్ట సేవలను స్మరించుకుంటూ, ఆయన ఆశయాల సాధనకు ప్రతి ఒక్కరూ కృషి చేయాలని పలువురు వక్తలు పిలుపు నిచ్చారు. కళాశాల ప్రిన్సిపల్ డాక్టర్ అనగాని హరికృష్ణ అధ్యక్షతన నిర్వహించిన ఐదవ వర్ధంతి సంస్మరణ సభలో పలువురు మాట్లాడుతూ కళాశాల అభివృద్ధికి స్వర్గీయ డాక్టర్ ఎస్.ఆర్.కె. ప్రసాద్ అందించిన సేవలు, చేసిన కృషి చిరస్మరణీయమని, మారుతున్న విద్యా ప్రమాణాలు, సమకాలీన అవసరాలకు అనుగుణంగా కళాశాలను అభివృద్ధి చేయడంలో ఆయన విశేష కృషి చేశారని తెలిపారు. విద్యాసంస్థ అభ్యున్నతికి ఆయన అందించిన సేవలు భావితరాలకు స్ఫూర్తిదాయకంగా నిలుస్తాయని కొనియాడారు. ఆర్ టి ఈ ఐ సొసైటీ వైస్ ప్రెసిడెంట్ ఎన్ వి కె ప్రసాద్ మాట్లాడుతూ డాక్టర్ ఎస్.ఆర్.కె. ప్రసాద్ విద్యా రంగానికి, సమాజానికి అందించిన సేవలు ఎంతో విలువైనవని పేర్కొన్నారు. కళాశాల సెక్రటరీ, కరస్పాండెంట్ వల్లభనేని బుచ్చయ్య చౌదరి మాట్లాడుతూ, ప్రసాద్ ఆశయాలకు అనుగుణంగా కళాశాల విద్యా ప్రమాణాలను మరింత మెరుగుపరిచేందుకు యాజమాన్యం నిరంతరం కృషి చేస్తుందన్నారు. ఎన్టీఆర్ ట్రస్ట్, కళాశాల యూత్ రెడ్ క్రాస్ సంయుక్త ఆధ్వర్యంలో రక్తదాన శిబిరం నిర్వహించగా 52 మంది విద్యార్థులు రక్తదానం చేశారు. తొలుత ఆయన విగ్రహానికి పూలమాలలు వేసి నివాళులర్పించారు. కార్యక్రమంలో దండమూడి ధరణి కుమార్, కళాశాల వైస్ ప్రిన్సిపల్ ఆర్. ప్రసన్న బాబు, అధ్యాపకులు డాక్టర్ పి. శ్రీనివాసరావు, యు. గోపికృష్ణ, డాక్టర్ ప్రకాష్ బాబు, కార్యాలయ సూపరింటెండెంట్ అమరేష్ రెడ్డి, అధ్యాపకేతర సిబ్బంది, ఎన్.సి.సి. క్యాడెట్లు, ఎన్.ఎస్.ఎస్. వాలంటీర్లు, విద్యార్థులు పాల్గొన్నారు.