శ్రీవారి చిత్రకారుడు శ్రీనివాసన్ కన్నుమూత
తిరుపతి మేజర్ న్యూస్:
హిందువుల ఇంట కొలువైన శ్రీ వేంకటేశ్వరస్వామి చిత్రపటాల వెనుక ఉన్న అద్భుత కళాకారుడు ఎస్.ఎం. శ్రీనివాసన్ వయోభారంతో (86) ఇటీవల కన్ను ముశారు. ఆయన మృతి పట్ల భక్తులు, కళాకారులు సంతాపం వ్యక్తం చేస్తున్నారు. తిరుమల శ్రీవేంకటేశ్వర స్వామి వారి దివ్యమంగళ స్వరూపాన్ని తన కుంచెతో చిత్రించి, కోట్లాది భక్తుల పూజా మందిరాల్లో కొలువు దీరేలా చేసిన ప్రముఖ చిత్రకారుడు శ్రీనివాసన్. తమిళనాడుకు చెందిన శ్రీనివాసన్, ప్రముఖ చిత్రకారుడు కొండయ్య రాజు వద్ద చిత్రకళలో శిక్షణ పొందారు. 1970లో టీటీడీ ఆహ్వానం మేరకు తిరుమల ఆలయ గర్భగుడిలోకి వెళ్లి, మూల విరాట్టును ప్రత్యక్షంగా దర్శించి స్వామి వారి దివ్య రూపాన్ని చిత్రించారు. ఆయన రూపొందించిన శ్రీవారి చిత్రం కాలక్రమంలో క్యాలెండర్లు, చిత్రపటాల రూపంలో దేశ విదేశాల్లోని భక్తుల ఇళ్లలో పూజలు అందుకుంటోంది. కళాకారుడు దూరమైనా, ఆయన కుంచెతో చిత్రించిన శ్రీవారి దివ్యరూపం మాత్రం తరతరాలు భక్తుల హృదయాల్లో చిరస్థాయిగా నిలిచి పోతుంది.
ఎస్. నగేష్ ప్రత్యేక ప్రతినిధి